Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 118 Hüküm no: 85 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanzâde Mehmed Ağa’nın tasarrufunda olan vakıf ev ve arsayı Eyüb Efendi’ye sattığı Mahmiye-i İstanbul’da Âşık Paşa mahallesi ahâlîsinden el-Hâc Sinanzâde demekle ma‘rûf Mehmed Ağa meclis-i şer‘-i şerîf-i enverde râfi‘u’l-kitâbi’l-müstetâb el-Hâc Eyüb Efendi b. Mehmed Ağa mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Haremeyn-i şerîfeyn vakfından ma‘rifet-i mütevellî ile kendiye ferâğ ve tefvîz eylediğim menzil bir tarafdan el-Hâc Veli veresesi mülkü ve bir tarafdan Meryem Hatun mülkü ve bir tarafdan tarîk-ı âm ile mahdûd arsasının Sanavber Hatun vakfına senevî üçer yüz akçe mukāta‘a-i kadîmesi olup üzerinde olan eşcâr ve bi’r-i mâ ve zukāk tarafında vâki‘ taş duvarı müştemil ebniye-i memlûkemi tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr el-Hâc Eyüb Efendi’ye sekiz yüz guruşa bey‘ ve temlîk ve teslîm ve arsa-i mezbûreyi dahi bâ-ma‘rifet-i mütevellî meccânen mezbûr el-Hâc Eyüb Efendi’ye ferâğ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i mezbûr sekiz yüz guruşu gāib ani’l-meclis Karakaş Kemâl Yahûdî yediyle tamamen ve kâmilen ahz u kabz ve istifâ eyledim arsa-i merkūme mezbûr el-Hâc Eyüb Efendi’nin hakk-ı müfevvazı ve üzerinde olan ebniye mülk-i müşterâsıdır. Kat‘a hakk u alâkam kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Salih Halîfe b. İsmail, Ömer Halîfe b. Ahmed, el-Hâc Halil Halîfe, Molla Osman b. Ömer, Kapudanzâde Ahmed Efendi, Mustafa b. el-Hâc Ali, Baba Ali b. el-Hâc Ali, Surnici Ali b. Ahmed, Mehmed Hoca b. eş-Şeyh Ahmed, Çoban Ali Haseki b. Abdullah, Üstâd Mehmed Çavuş b. Salih, Ahmed Beşe tâbi‘-i Mehmed Çavuş.