Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 119 Hüküm no: 86 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un tahta bıçkısı hissesini Mehmed Nurullah Efendi’ye sattığı Medîne-i Üsküdar muzâfâtından Şile kasabası sâkinlerinden olup mahmiye-i İstanbul’da Molla Fenârî mahallesinde müsâfereten mütemekkine Fâtıma bt. Muslu b. Abdullah nâm hatun tarafından bey‘-ı âti’z-zikri ikrâra vekîl olduğu zât-ı merkūmeyi bi’l-ma‘rifeti’ş-şer‘iye ârifân el-Hâc Süleyman b. Abdullah ve el-Hâc Ali b. Halil nâm kimesneler şehâdetleriyle şer‘an sâbit olan el-Hâc İsmail b. ( ) nâm kimesne meclis-i şer‘-i şerîf-i lâzımü’t-teşrîfde umdetü’l-müderrisîni’l-kirâm râfi‘u’l-kitâb Mehmed Nurullah Efendi b. el-mevâli’l-izâm Abdurrahman Efendi mahzarında bi’l-vekâle ikrâr ve takrîr-i kelâm edip vâlidemden mevrûs yedimde mülk ve hakkım olup medîne-i mezbûra tâbi‘ Taşköprü nâhiyesinde Şivişli karyesinde vâki‘ ma‘lûmü’l-hudûd hızar ta‘bîr olunur tahta bıçkısında olan nısf hissemi tarafeynden îcâb ve kâbûlü hâvî bey‘-ı bâtt-ı sahîh-i şer‘î ile mûmâ-ileyh Mehmed Nurullah Efendi’ye yirmi beş guruşa bey‘ ve temlîk ve mahâllinde kabza taslît eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezkûr yirmi beş guruşu yedinden tamamen ve kâmilen ahz u kabz eyledim. Ba‘de’l-yevm sâlifü’l-beyân bıçkının nısfı mûmâ-ileyh Mehmed Nurullah Efendi’nin mülk-i müşterâsı ve hakk-ı sırfı olup kat‘a alâka ve medhalim kalmadı dedi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Fındıklı İmâmı İbrahim Efendi b. Ali, Molla Süleyman b. ( ), el-Hâc Ali b. Halil, el-Hâc Süleyman b. Abdullah, Müezzin Molla Efendi b. ( ).