Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 121 Hüküm no: 88 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa‘nın küçük kızı Hanife ile Süleyman Efendi’nin muhâlaa ile boşandıkları Husûs-ı âti’l-beyânın mahâllinde ketb ü tahrîri için savb-ı şer‘-i kavîmden irsâl olunan Mevlânâ es-Seyyid Feyzullah Efendi b. Abdülkerim Efendi mahmiye-i İstanbul’da Kabasakal Sinan Ağa mahallesinde fahrü’l-emâcid ve’l-akrân el-Hâc Mustafa Ağa [b.] İbrahim Ağa’nın sâkin oldukları sa‘âdethânelerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde yine mahmiye-i mezbûrede <> Peykhâne-i şehr-i yâri kurbünde Uzun Şücâ‘ mahallesi ahâlîsinden Hasan Ağa b. Mehmed nâm kimesne meclis-i ma‘kūd-ı mezkûrda bâ‘isü hâze’l-kitâb Süleyman Efendi b. Ali mahzarında ikrâr-ı tâm ve takrîr-i kelâm edip işbu sulbiye sagīre kızım Hanife’yi otuz bin akçe mehr-i müeccel tesmiyesiyle bundan akdem mûmâ-ileyh Süleyman Efendi’ye bi’l-velâye inkâh ve tezvîc eylediğimde ol dahi ber-vech-i muharrer tezevvüc ve kabûl etmişidi. Lâkin mûmâ-ileyh Süleyman Efendi ile hüsn ü imtizâc mümkün olmamağla otuz bin akçe mehri ve nafaka-i iddet ve me’ûnet-i süknâsı üzerlerine mûmâ-ileyh Süleyman Efendi ile bi’l-velâye muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru ba‘de’l-kabûl mezbûr Hasan Ağa ile dâmadı işbu hazır bi’l-meclis bacanağı Mehmed Ağa b. Ahmed nâm kimesnelerden her biri fîmâ-ba‘d sagīre-i mezbûre ba‘de’l-bulûğ mezbûr Süleyman Efendi’den mehr-i mezkûra müte‘allika nesne taleb ve da‘vâ ve ahz u kabz ederse me’hûzuna her birimiz dâmin ve kefîl olduk dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Mustafa Çelebi b. Mehmed ve Muhzır el-Hâc Halil b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Umdetü’l-müderrisîni’l-kirâm Mustafa Efendi b. Mehmed, el-Hâc Mustafa Ağa b. İbrahim, İmâm Halil Efendi b. Hasan, Mehmed Ağa b. es-Seyyid Ahmed Ağa, Molla Abdullah el-müezzin, el-Hâc Halil b. Mehmed.