Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 122 Hüküm no: 90 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un Piyalepaşa mahallesinde bulunan ve küçük çocuklarına kalan yarım hisse tamire muhtaç vakıf evin satması Mahmiye-i İstanbul’da Karakî mahallesinde sâkin iken bundan akdem vefât eden Zeyneb bt. Ahmed Ağa b. Veli Baba nâm hatunun sadriye kızları Hadîce ve Hafize nâm sagīrelerin ammileri ve kıbel-i şer‘-i enverden mansûb vasîleri olan bâ‘isü hâze’l-kitâb Yusuf Ağa b. Ahmed nâm kimesne meclis-i şer‘-i hatîr-i lâzımü’t-tevkīrde bi’l-vesâye takrîr-i kelâm ve bastü ani’l-merâm edip merhûm ve mağfûrün-leh Minkārîzâde Abdullah Efendi vakfından olup mahrûse-i Galata kazâsına tâbi‘ kasaba-i Kasım Paşa’da Küçük Piyale Paşa mahallesinde vâki‘ lede’l-ahâlî ve’l-cîrân ma‘lûmü’l-hudûd menzilin nısf-ı şâyi‘i müteveffât-ı mezbûrenin hayatında icâreteyn-i ma‘lûmeteyn ile tasarrufunda olup ba‘de vefâtihâ nısf-ı menzil-i mezkûr kızları sagīretân-ı mezbûretâna intikāl edip menzil-i mezkûr müşrif-i harâb olmağla kābil-i süknâ ve ifrâz mümkün olmayıp istidâne ile ta‘mîr olundukda hâsılı harcına vefâ etmemeğin nısf-ı menzil bedel-i misli ve ma‘rifet-i mütevellî ile âhara ferâğ ve bedel-i ferâğı istirbâh ve istiğlâl olunmak sagīretân-ı mezbûretân haklarında min-külli’l-vücûh enfa‘ ve evlâ olmağın vâki‘ hâl husûs-ı mezkûra vukūf-ı tâmları olan işbu hâzırûn bi’l-meclis sikāt-ı muvahhidînden istihbâr olunup haberleri tahrîr ve mûcebince kıbel-i şer‘den bana izin verilmek bi’l-vesâye matlûbumdur dedikde hakīkat-ı hâl vasîyy-i mezbûrun bâlâda takrîr ve beyân ve şerh ü ayân eylediği vech üzere idiğini zeyl-i kitâbda muharrerü’l-esâmî sikāt-ı muvahhidînden her biri alâ-tarîkı’ş-şehâde ihbâr etmeğin nısf-ı menzil-i mezbûru ber-vech-i muharrer bedel-i misli ve ma‘rifet-i mütevellî ile âhara ferâğa kıbel-i şer‘den vasîyy-i mezbûr Yusuf Ağa’ya izin birle mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Mehmed Çelebi b. Abdullah, Mustafa Çelebi b. Abdullah, el-Hâc Halil b. Abdullah, Mustafa Ağa b. Hüseyin, Ali b. Ahmed, İsmail Ağa b. Ahmed.