Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 124 Hüküm no: 92 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğbolu ve Silistre Kıbtiyân cizyelerinin tahsili Hilâl-i sütûrda mastûr husûsun mahâllinde ketb ve tahrîri iltimâs olunmağın savb-ı şer‘-i kavîmden me’zûnen irsâl olunan Mevlânâ Ahmed Efendi b. Mehmed Efendi mahmiye-i İstanbul’da Hocalu Paşa Hânı’nda hadîka-i hâssa hasekilerinden Ali Ağa b. Abdurrahman’ın sâkin olduğu odaya varıp zeyl-i sahîfede [mastûr]ü’l-esâmî Müslimîn mahzarlarında akd-i meclis-i şer‘-i kavîm eyledikde mezbûr Ali Ağa meclis-i ma‘kūd-ı mezbûrda mahmiye-i mezbûrda Paşakapısı kurbünde Lala Hayreddin mahallesi sükkânından olup maktûl İbrahim Paşa Hazînedârı Mustafa Ağa Kethudâsı Hüseyin Ağa b. Ahmed b. Ali tarafından husûs-ı âti’l-beyânı tasdîka vekîl olduğu Abdi Çavuş Ağa b. İbrahim ve Keskinli Ahmed Ağa b. Abdullah şehâdetleriyle şer‘an sâbit olan Çukadârı Mustafa Ağa b. Receb mahzarında ikrâr-ı tâm ve takrîr-i kelâm edip târih-i kitâbdan dört sene mukaddem Niğbolu ve Silistre kıbtiyân cizyelerini alıvermek için bi-tarîkı’r-rüşve mâlımdan altı bin guruş mezbûr Hazînedâr Mustafa Ağa’ya def‘ ve teslîme müvekkil-i mezbûr Hüseyin Ağa’ya <> emreylediğimde meblağ-ı mezbûru vermeyip yedinde kalmağın meblağ-ı mezbûrdan mâ‘adâ bin guruş ile iki yüz kırk guruş kıymetli iki re’s bargir müvekkil-i mezbûr Hüseyin Ağa’ya def‘ ü teslîm ol dahi yedimden ber-vech-i muharrer ahz u kabz etmeğin meblağ-ı mecmû‘-ı mezkûr yedi bin iki yüz kırk guruşu müvekkil-i merkūm Hüseyin Ağa’dan taleb ve da‘vâ eylediğimde ol dahi bi’l-külliye inkâr etmekle beynimizde ba‘de’n-nizâ‘ tavassut-ı muslihûn ile an-inkârin müvekkil-i mezbûr Hüseyin Ağa ile iki bin beş yüz yetmiş guruş üzerine inşâ-i akd-i sulh eylediğimde ol dahi sulh-ı mezkûru kabûl ve bedel-i sulh olan meblağ-ı mezbûr iki bin beş yüz yetmiş guruşu müvekkil-i merkūm yedinden tamamen ahz u kabz eylediğimden sonra husûs-ı mezkûra müte‘allika âmme-i da‘vâdan müvekkil-i mezbûr Hüseyin Ağa’nın zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi bana medfû‘u olan bedel-i mezkûr iki bin beş yüz yetmiş guruşa müte‘allika âmme-i da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î vâki‘i hâli mevlânâ-yı mezbûr mahâllinde ketb ve tahrîr ve ma‘an irsâl olunan Çukadâr Mustafa b. Abdullah ve Muhzır Mehmed b. İbrahim ile meclis-i şer‘a gelip her biri inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene selâse ve erba‘în mie ve elf. Şuhûdü’l-hâl: Mustafa Efendi b. Ali kâtib-i mev[kû]fât, Bosnalı Hüseyin Çavuş Ağa b. el-Hâc Ali, Berber Yakub Çelebi b. Ahmed, Seyyid İbrahim b. el-Hâc Ebûbekir.