Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 125 Hüküm no: 93 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın tasarrufundaki tımar gelirine el koyduğu iddiasıyla Mustafa Ağa aleyhine açtığı davanın sulhla sonuçlandığı Fi’l-asl vilâyet-i Anadolu’da Merzifon kasabası ahâlîsinden olup mahmiye-i İstanbul’da Ayasofya-i kebîr mahallesinde müsâfiren sâkin Mustafa Ağa b. Veli nâm kimesne meclis-i şer‘-i şerîf-i enverde mahmiye-i mezbûrede Hocahanı kurbünde Dâye Hatun mahallesinde sâkin bâ‘isü hâze’l-kitâb diğer Mustafa Ağa b. Mehmed mahzarında ikrâr ve takrîr-i kelâm edip Amasya Sancağı’nda Girdikân nâhiyesinde Yağmur nâm karye ve gayriden on altı bin akçe tımar alaybeyi arzıyla benim tasarrufumda iken merkūm diğer Mustafa Ağa ahz ve üzerine berat ve mahsûlâtını ahz u kabz etmişidi deyü üzerine da‘vâya tesâddî eylediğimde beynimizde nizâ‘-ı küllî cereyânından sonra muslihûn tavassutuyla mezbûr diğer Mustafa Ağa yedinde olan mârrü’z-zikr beratı bana def‘ ve teslîm ve tımar-ı mezkûra müte‘allika de‘âvî ve mutâlebât ve muhâsamâtdan beni ibrâ-i âmm-ı râfi‘u’l-hısâm ile ibrâ ve ıskāt eylediğinde ben dahi tımar-ı mezkûr mahsûlâtından makbûzâtına ve sâire müte‘allika âmme-i da‘vâdan mezkûr diğer Mustafa Ağa’yı ibrâ-i âmm-ı râfi‘u’l-hısâm ile ibrâ ve ıskāt eyledim min-ba‘d zikrolunan beratı yedinden ba‘de’l-kabz husûs-ı mezkûra müte‘allika bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: İbrahim Ağa b. el-Hâc Hüseyin, Mustafa Ağa b. Receb, Ömer Ağa b. Hüseyin, Ahmed Ağa b. Zekeriya, Ahmed Ağa b. Mustafa, es-Seyyid Mustafa b. Mehmed Efendi, Ali Ağa b. Hüseyin, es-Seyyid İbrahim Efendi b. Mehmed.