Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 125 Hüküm no: 94 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa’nın Subaşı Hasan tarafından el konulan köy geliri için vekil tayin edildiği Bâ-imzâ-i hazret-i efendi vekâlet. Bundan esbak Bender-i Cidde vâlîsi olduğu hâlde intikāl-i dâr-ı bekā eden merhûm Ali Paşa b. Mehmed’in sulbî kebîr oğlu es-Seyyid Halil Bey asâleten ve karındaşı Abdülhalim Bey’in tesviye-i emrine kıbel-i şer‘den vasî nasb ve ta‘yîn olunmağla vesâyeten meclis-i şer‘-i şerîf-i enverde râfi‘u’l-kitâb el-Hâc Ali b. Musa nâm kimesne mahzarında takrîr-i kelâm ve ta‘bîr ani’l-merâm edip iştirâken diyâr-ı Mısır’da mutasarrıf olduğumuz Bahtit karyemizi vilâyet-i merkūmede sâkin Subaşı Hasan Bey nâm kimesne bi-gayr-ı hakkın zabt ve tarafımıza âid olan mahsûlâtımızı kabz etmekle karye-i merkūmemi ve makbûzu olan mahsûlât-ı şer‘iyemizi mezbûr Subaşı Hasan Bey’den taleb ve da‘vâ ve ahz u kabza mezbûr el-Hâc Ali’yi bi’l-asâle ve bi’l-vesâye tarafımdan vekîl ve nâib-i menâb nasb ve ta‘yîn eyledim dedikde merkūm el-Hâc Ali dahi vekâlet-i merkūmeyi kabûl ve hidemât-ı lâzımesini mahâllinde edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fî-gurreti Zilka‘deti’ş-şerîfe li-sene selâse ve erba‘în ve mie ve elf min-hicreti men-lehu’l-izzü ve’ş-şeref Şuhûdü’l-hâl: Mehmed Bey b. Ali ve diğer Mehmed Bey b. Ali, Mustafa Bey b. Osman.