Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 126 Hüküm no: 95 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Todori ve ortağının Sekbân fırınına teslim ettikleri unların parasını aldıkları Mahmiye-i İstanbul’da mîrî uncu tâifesinden Todori v. Yorgi ve şerîki Mihal v. Todori nâm zimmîler meclis-i şer‘-i şerîf-i enverde sâbıkā Gümrük-i âmire emîni umdetü’l-emâcid ve’l-a‘yân bâ‘isü hâze’l-kitâb el-Hâc İbrahim Ağa b. Ahmed Ağa b. Ali tarafından husûs-ı âti’z-zikri tasdîka vekîl olduğu nehc-i şer‘î ve tarîk-ı mer‘î üzere sâbit olan diğer el-Hâc İbrahim b. el-Hâc Ahmed mahzarında her biri ikrâr ve takrîr-i kelâm edip bin yüz kırk üç senesi Cumâdelûlâsı’nın on sekizinci gününden sene-i mezbûre Ramazan-ı şerîfi gurresine gelince yüz üç günde Dergâh-ı âlî dâme mahfûfen bi’l-meâli yeniçerileri ta‘yînâtlarıʼçün fodula kâtibinin on dört kıt‘a tezkiresi mantûkunca sekbân fırınında kabza me’mûr olanlara bey‘ ve teslîm eylediğim beş bin iki yüz on yedi keyl ve altı vakıyye dakīkin üç bin dört yüz yirmi yedi keyli yüz yirmii beşer akçeden dört yüz on bir bin iki yüz kırk akçe ve bin yedi yüz doksan keyli yüz on beşer akçeden iki yüz beş bin sekiz yüz elli akçe ve altı vakıyye dakīk otuz altı akçe min-haysü’l-mecmû‘ altı yüz on yedi bin yüz yirmi akçe emîn-i mûmâ-ileyhin mutassarıf olduğu târih-i mezkûrda gümrük-i mezbûr mâlından bâ-fermân-ı âlî havâle olunmağın emîn-i mûmâ-ileyh târih-i mezkûrda meblağ-ı mecmû‘ mezkûr altı yüz on yedi bin yüz yirmi akçeyi tamamen def‘ ve teslîm biz dahi müvekkil-i emîn-i mûmâ-ileyh yedinden tamamen ahz u kabz eyledik min-ba‘d meblağ-ı mecmû‘-ı mezkûrdan emîn-i mûmâ-ileyh yedinde ve zimmetinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mustafa Çelebi b. Abdullah, Mehmed Çelebi b. Abdullah, Ahmed Çelebi b. el-Hâc Hüseyin, Yakub Çelebi b. Abdullah, es-Seyyid Mehmed b. Hüseyin, Mehmed Efendi el-kâtib.