Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 127 Hüküm no: 96 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Manisalı Çelebi mahallesinde bulunan evini sattığı Husûs-ı âti’l-beyânın mahâllinde ketb ve tahrîri iltimâs olunmağın bu fakīr bizzât mahmiye-i İstanbul’da Atpazarı kurbünde vâki‘ Canba[z] el-Hâc Ali Ağa b. İbrahim’in ahırı hânesine varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i kavîm eylediğimde mahmiye-i mezbûrede Manisalı Çelebi mahallesi sâkinelerinden olup zâtı Mehmed Ağa b. Ahmed ve İsmail Odabaşı b. Mustafa nâm kimesneler ta‘rîfleriyle mu‘arrefe olan Şerîfe Âişe Hatun bt. es-Seyyid Abdurrauf meclis-i ma‘kūd-ı mezkûrda işbu râfi‘u’l-kitâb merkūm el-Hâc Ali Ağa b. İbrahim mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan âhar mülküm ve bir tarafdan mezbûr el-Hâc Ali’nin vakfı ve bir tarafdan ba‘zen Havva Hatun ve ba‘zen tarîk-ı hâs ile mahdûd fevkāni iki bâb oda ve iki sofa ve tabaka-i vustâda iki bâb oda ve tahtânî bir matbah ve üç kenîf ve bir magsel ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr el-Hâc Ali Ağa’ya dört yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr dört yüz guruşu müşteri-yi merkūm el-Hâc Ali Ağa yedinden tamamen ahz u kabz eyledim fîmâ-ba‘d menzil-i mahdûd-ı mezkûr mezbûr el-Hâc Ali Ağa’nın mülk-i müşterâsı ve hakk-ı sarîh-i sırfı olup kat‘a benim alâka ve medhalim kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis min-Zilka‘de li-sene 1143. Şuhûdü’l-hâl: Hacı Mustafa b. Mehmed, Cafer Beşe b. Abdullah, Ahmed Ağa b. Hüseyin, Mehmed Odabaşı b. Mustafa c. [cemâ‘at] 81, Mustafa Çelebi b. Mehmed Yazıcızâde, Ahmed Çelebi b. Abdullah, Süleyman Beşe b. İbrahim, Ömer Odabaşı b. Veli, Süleyman Ağa b. Abdullah, Hacı Ahmed b. Abdullah, Süleyman Odabaşı b. Abdullah.