Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 127 Hüküm no: 97 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa vakfı olan harab evin yerine mütevellî izniyle yeni ev yapmak isteyen Hasan Ağa’nın keşif talebi Bâ-imzâ-i hazret-i veliyyü’n-ni‘am. Mahmiye-i İstanbul’da Molla Aşkī mahallesi sükkânından bâ‘isü’l-kitâb el-Hâc Hüseyin Ağa b. Ahmed meclis-i şer‘de takrîr-i kelâm [ve ta‘bîr] ani’l-merâm edip mahmiye-i mezbûrede Balatkapısı dâhilinde Hoca Ali mahallesinde vâki‘ merhûm Mahmud Ağa gallesini evlâd-ı evlâd-ı evlâdına ba‘de’l-inkırâz mahalle-i mezbûre câmi‘-i şerîfinde tahmîdhân olan müezzine şart ve ta‘yîn eylediği bir tarafdan İsmail Bey menzili ve bir tarafdan ba‘zen yine mezbûr İsmail Bey ve ba‘zen Baltacızâde Mustafa Çelebi ve ba‘zen Fâtıma Hatun menzilleri ve iki tarafdan tarîk-ı âm ile mahdûd muhterik menzil arsası üzerine mu‘accelesine mahsûben binâya rağbet eder kimesne olmayıp ve müceddeden binâya dahi taraf-ı vakf dahi müsâ‘id olmamağla vakf-ı mezbûr mütevellîsi Mehmed Efendi b. Mehmed arsa-i mezbûreyi senede üç yüz akçe mukāta‘a ile bi’t-tevliye bana îcâr ben dahi ba‘de’l-istîcâr ve’l-kabûl üzerine mâlım ile nefsimiʼçün mülk olmak üzere binâya izin ve yedime memhûr mütevellî temessükü vermekle enkāz-ı mevcûde-i mevkūfesi keşf ve tahmîn-i sahîh ile tahmîn ve takvîm olunmak matlûbumdur dedikde taraf-ı şer‘den keşf nâibi Mevlânâ Mehmed b. Abdullah Efendi Hâssa mi‘mârlarından Hüseyin Halîfe b. Ali ve Süleyman Halîfe b. Abdullah ile arsa-i mevkūfe-i mezbûre üzerine varıp mütevellî-yi vakf-ı mezbûr Mehmed Efendi ve evlâd-ı vâkıfdan Mehmed Çelebi b. Süleyman ve Âişe bt. Mustafa ve zeyl-i kitâbda muharrerü’l-esâmî Müslimîn huzûrlarında mi‘mârân-ı mezbûrân arsa-i mezbûreyi mesâha eylediklerinde tûlen ve arzen be-hesâb-ı terbî‘î bin dokuz yüz otuz iki zirâ‘ olup derûnunda enkāz-ı mevcûde-i mevkūfesi olan taşın kıymeti üç bin akçe olduğu mi‘mârân-ı [26a] mezbûrân ve Müslimûn-ı hâzırûn bi’l-ittifâk haber verdiklerini mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Çukadâr el-Hâc Süleyman b. ( ) ve Muhzır Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 2 Zilka‘de sene 1143. Şuhûdü’l-hâl: el-Hâc Abdurrahman Efendi b. el-Hâc Ali imâm-ı mahalle-i mezbûr, Müezzin Abdülkadir b. Ali, Ahmed Çelebi b. Mahmud, Halil Ağa b. el-Hâc Sinan, İbrahim Efendi b. Yusuf Çelebi, Abdullah Çelebi b. İbrahim, Halil Ağa b. İbrahim, Sahhâfzâde Mustafa Çelebi, Ali Beşe b. Receb, Ali Beşe b. Mehmed, Mustafa b. el-Hâc Abdurrahman, Ahmed Çelebi b. Mustafa, Mahmud Ağa b. Receb, Mustafa Bey b. Mehmed ve gayruhum.