Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 130 Hüküm no: 101 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keşan mukataası sahibi Bostancıbaşı Süleyman Ağa ile mukataayı uhdesine alan Haseki Ahmed arasındaki davada Ahmed’in iddiasının geçersiz olduğu Bostâniyân-ı hâssa hasekiyelerinden Ahmed Haseki b. Mehmed meclis-i şer‘-i şerîf-i enverde sâbıkā Bostancıbaşı olan iftihârü’l emâcid ve’l-ekârim râfi‘u’l-kitâbi’l-müstetâb Süleyman Ağa b. Hüseyin mahzarında üzerine da‘vâ ve takrîr-i kelâm edip mûmâ-ileyh Süleyman Ağa’nın vilâyet-i Rumeli’nde Keşan mukāta‘ası uhdesinde olmağla bin yüz otuz altı ve otuz yedi senelerini zabt ve mahsûlünü kabz etmek üzere yedi bin yedi yüz elli guruşa bana iltizâm eyledikde ben dahi iltizâm kabûl ve meblağ-ı mezbûru yedimden tamamen ahz u kabz ettikden sonra mukāta‘a-i mezbûreyi zabteylediğimde makbûzum ancak beş bin guruşa bâliğ olup iki bin yedi yüz guruş zararım olmağla mûmâ-ileyh Süleyman Ağa’nın yedimden kabz eylediği yedi bin yedi yüz elli guruşdan istîfa eylediğim beş bin guruşdan mâ‘adâ eylemediğim iki bin yedi yüz elli [guruşu] bana red ve teslîme mezbûr Süleyman Ağa’ya tenbîh olunmak murâdımdır dedikde gıbbe’s-suâl mûmâ-ileyh Süleyman Ağa cevâbında fi’l-vâki‘ hâl müdde‘î-yi mezbûr Ahmed Haseki’nin takrîr-i meşrûhu üzere olup zikrolunan Keşan Mukāta‘ası uhdemde olmağla otuz altı ve otuz yedi senelerin müdde‘î-yi merkūm Ahmed Haseki’ye yedi bin yedi yüz elli guruşa iltizâm ol dahi iltizâm kabûl ve bedel-i iltizâmı tamamen ve kâmilen kabz ve tesellüm edip istihlâk eyledikden sonra müdde‘î-yi merkūme Ahmed Haseki meblağ-ı mezbûra müte‘allika âmme-i da‘vâdan zimmetimi ibrâ ve ıskāt ben dahi kabûl eylemişidim deyü def‘le mukābele edicek gıbbe’l-istintâk ve’l-inkâr ve isre talebi’l-beyyine udûl-i ahrâr-ı ricâl-i Müslimînden olup medîne-i Hazret-i Ebî Eyüb Ensârî radıye anhü rabbihi’l-Bârî’de sâkin Zeynelabidin b. Ahmed ve Mehmed b. Şa‘ban ve İstanbul’da Dâye Hatun mahallesi ahâlîsinden el-Hâc Hüseyin b. Ali nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müdde‘î-yi mezbûr Ahmed Haseki mûmâ-ileyh Süleyman Ağa’dan bin yüz otuz altı ve otuz yedi senelerine mahsûb olmak üzere mûmâ-ileyhin uhdesinde olan Keşan mukāta‘asını yedi bin yedi yüz elli guruşa iltizâm ve bedel-i iltizâmı yedinden tamamen ahz u kabz ve istihlâk eyledikden sonra mezbûr Ahmed Haseki mûmâ-ileyh Süleyman Ağa’ya medfû‘u olan yedi bin yedi yüz elli guruş bedel-i iltizâma müte‘allik da‘vâdan mûmâ-ileyh Süleyman Ağa’nın bizim huzûrumuzda zimmetini ibrâ ve ıskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olup bî-vech mu‘ârazadan men‘ olundukdan sonra mezkûr Ahmed Haseki ibrâ-yı mezbûrun vukū‘unu i‘tirâf lâkin muvâza‘a tarîkiyle olmuşidi deyü tekrar nizâ‘a şürû‘ edip da‘vâsı tenâkus olmağla istimâ‘ olunmayıp mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene 1143. Şuhûdü’l-hâl: Fahrü’l-kuzât Musazâde Abdullah Efendi, Mehmed Emîn Efendi b. ( ), Hüseyin Ağa b. Abdullah, Yusuf Ağa b. Abdullah, el-Hâc Ali Kethudâ.