Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 131 Hüküm no: 102 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Efendi’nin tasarrufunda olan Pir Ahmed vakfı arsasını oğulları Mehmed ve Ali Efendi’ye sattığı Mahmiye-i İstanbul’da Aksaray kurbünde el-Hâc Bayram mahallesinde vâki‘ bir tarafdan Emine ve Âişe hatunlar mülk menzilleri ve bir tarafdan Haremeyn vakfından Mehmed Ağa tasarrufunda olan vakıf menzil ve bir tarafdan kāri‘ Abdurrahman Efendi menzili ve ba‘zen es-Seyyid Ahmed Efendi tasarrufunda olan vakıf menzil ve bir tarafdan Mehmed Çavuş nâm müteveffânın veresesi mülkü ve bir tarafdan Mukāta‘a Halîfesi Mehmed Efendi tasarrufunda olan bahçe ve bir tarafdan tarîk-ı âm ile mahdûd bir kıt‘a bi’r-i mâ ve kenîf ve kömürlük ve eşcâr-ı müsmire ve gayr-ı müsmire bahçeli müştemil mülk arsası merhûm Pir Ahmed nâm sahibü’l-hayrın süknâsı ulemâdan bir recüle meşrûta vakfı olup ebniye-i mezbûrenin mâliki ve arsa-i merkūmenin tevcîh-i hâkimü’ş-şer‘le mutasarrıfı olan Abdurrahman Efendi ve [b.] Hasan meclis-i şer‘de sulbî kebîr oğulları Mehmed Efendi ve Ali Efendi mahzarlarında ikrâr-ı tâm ve takrîr-i kelâm edip arsa-i mezbûre ber-vech-i meşrû‘ tevcîh-i hâkimü’ş-şer‘le taht-ı tasarrufumda olmağla üzerinde olan ebniye-i memlûkesi oğullarım mezbûrân Mehmed Efendi ve Ali Efendi’ye ale’l-iştirâ[ki]’s-seviy seksen guruşa bey‘ ve teslîm ve temlîk eylediğimde onlar dahi ber-vech-i muharrer iştir[â] ve tesellüm ve temellük ve kabûl eylediklerinden sonra semeni olan seksen guruşu yedlerinden tamamen ahz u kabz ve tesellüm edip ebniye-i merkūme mezbûrân Mehmed Efendi ve Ali Efendi’nin mülk-i müşterâsı olup ve arsa-i mezbûreden dahi kasr-ı yed eyledim dedikde gıbbe’t-tasdîkı’ş-şer‘î işbu kitâb-ı müşgîn nikāb tevkî‘-i refî‘-i müstetâbı ile şerefyâb olan hâkim-i ma‘delet-nisâb tû[bâ]-leh ve hüsnü-meâb hazretleri dahi arsa-i mevkūfe-i mezbûre ber-mûceb-i şart-ı vâkıf mezbûrân Mehmed Efendi ve Ali Efendi’ye tevcîh edip tasarruflariʼçün işbu vesîka alâ-mâ-hüve’l-hakīka bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mehmed Efendi b. Abdullah Efendi el-imâm, Bayramzâde Mehmed Efendi, es-Seyyid Mehmed Efendi b. el-Hâc Halil, Mehmed Ağa b. Hasan Ağa, Ali Halîfe el-müezzin b. İsmail, Ahmed Çelebi b. ( ) kayyum-ı Murad Paşa, Ali Çelebi b. Mehmed Ağa.