Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 132 Hüküm no: 103 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beyefendi’nin uhdesinde olan mültezimlerin borçlarına Karakaş Kemâl’in iltizam işlemi ve kefaleti sahih olmadığından kefil olamayacağı Bâ-imzâ-i hazret-i Efendi sulh ve ibrâ mukāta‘adan. Mahmiye-i İstanbul’da Tekfursarayı kurbünde sâkin Yahûdî tâifesinden râfi‘u’s-sifr Karakaş Kemâl v. Yasef nâm Yahûdî meclis-i şer‘-i hatîr-i lâzımü’t-tevkīrde Kıblelizâde demekle arîf umdetü’l-emâcid ve’l-a‘yân Mehmed Beyefendi tarafından husûs-ı âti’l-beyânda husûmete vekîl olduğu el-Hâc Ebûbekir b. İbrahim ve Osman Bey b. Mehmed nâm kimesneler şehâdetleriyle mahzar-ı hasm-ı câhid-i şer‘îde şer‘an sâbit ve vekâletine hükm-i şer‘î lâhık olan Abdülgani Ağa b. el-Hâc Halil nâm kimesne mahzarında üzerine da‘vâ ve takrîr-i kelâm edip müvekkil-i mûmâ-ileyh Mehmed Beyefendi ber-vech-i mâlikâne uhdesinde olan Narda ve Sayada mukāta‘aların hazır bi’l-meclis Sinanoğlu el-Hâc Mehmed Ağa ile karındaşı Mustafa Ağa’ya bin yüz kırk iki senesinde vâki‘ Mart ibtidâsından bir sene tamamına değin zabt ve mahsûlâtını kabz etmek üzere kırk yedi bin altmış beş guruşa iltizâm eyledikde onlar dahi iltizâm kabûl etmekle bedel-i iltizâma ben kefîl olduğuma binâen müvekkil-i mûmâ-ileyh Mehmed Beyefendi meblağ-ı mezbûrdan mezbûrân el-Hâc Mehmed Ağa ve Mustafa Ağa’dan makbûzundan mâ‘adâ zimmetlerinde bâkī kalan dokuz bin yüz otuz yedi guruş bedel-i iltizâma sen kefîlsin deyü bi-gayr-ı hakkın beni ahz ü habs ve cebren dokuz bin yüz otuz yedi guruşu yedimden kabz ve tesellüm edip lâkin bedel-i iltizâma kefâlet-i sahîha olmadığını müş‘ir hâlâ şeyh-i meşâyihi’l-islâm müfti-yi âmmetü’l-enâm fazîletlü Şeyh Mehmed Efendi hazretlerinin imzâlarıyla mümzâ yedime işbu fetvâ-yı şerîfe i‘tâ olunmağın suâl olunup müvekkil-i mûmâ-ileyh Mehmed Beyefendi meblağ-ı mezbûru bana teslîme vekîl-i mezbûra kıbel-i şer‘den tenbîh olunmak murâdımdır dedikde gıbbe’s-suâl vekîl-i mezbûr Abdülgani Ağa cevâbında fi’l-vâki‘ hâl müdde‘î-yi mesfûr Karakaş Kemâl Yahûdî’nin takrîr-i meşrûhu üzere olup hâzırân bi’l-meclis Sinanoğlu el-Hâc Mehmed Ağa ve karındaşı Mustafa Ağa’nın müvekkil-i mûmâ-ileyh Mehmed Bey Efendi’den kırk yedi bin altmış beş guruşa iltizâm eyledikleri Narda ve Sayada mukāta‘aları mâlına müdde‘î-yi mesfûr Karakaş Kemâl Yahûdî kefîl olduğuna binâen mezbûrân yedinden makbûzundan mâ‘adâ [27b] zimmetlerinde bâkī kalan dokuz bin yüz otuz yedi guruşu müvekkil-i mûmâ-ileyh Mehmed Beyefendi müdde‘î-yi mesfûr Karakaş Kemâl Yahûdî yedinden ahz u kabz eylediğini bi’l-vekâle ikrâr ve i‘tirâf edip müdde‘î-yi mezbûrun yedinde olan fetvâ-yı şerîfeye nazar olundukda “Zeyd bir mukāta‘ayı Amr’a şu kadar guruşa iltizâm ile verdikde Bekir bedel-i iltizâma < kefîl olsa kefâlet-i mezbûre sahîha olur mu” deyü suâlinin cevâb-ı bâ-savâbından “olmaz” deyü buyurulmağın mûcebiyle meblağ-ı mezbûr dokuz bin yüz otuz yedi guruşu müvekkil-i mûmâ-ileyh Mehmed Beyefendi müdde‘î-yi mesfûr Karakaş Kemâl Yahûdî’ye red ve teslîme vekîl-i mezbûr Abdülgani Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene selâse ve erba‘în ve mie ve elf. Şuhûdü’l-hâl: Umdetü’l-meşâyih Müstakīmzâde Mehmed Said Efendi, umdetü’l-mevâli’l-izâm Pîrî Efendi, Fahrü’l-kuzât Mustafa Efendi telhîsî, Mehmed Çelebi kethudâ-yı muhzırân, Muhzır Salih b. Süleyman, Kethudâ el-Hâc Ali.