Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 133 Hüküm no: 104 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un kendisini küçük kızı ile terk edip giden kocası Nuh Ağa’dan nafaka talebi Bâ-imzâ-i hazret-i efendi, zevci üzerine nafaka. Mahmiye-i İstanbul’da Fenâyî mahallesi sâkinelerinden olup zâtı ta‘rîf-i şer‘î ile mu‘arrefe olan Afîfe Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevcim olan Nuh Ağa b. Mehmed beni bilâ-nafaka terk ve âhar diyâra gidip benim ve mezbûrun firâşından hâsıla ve benden mütevellide kızım sagīre Fâtıma’nın nafaka ve kisve-bahâya ihtiyâcım olmağla kıbel-i şer‘den kadr-ı mefrûz nafaka ve kisve-bahâ farz ve takdîr olunmak murâdımdır deyip hâl minvâl-i muharrer üzere olduğunu sikātü sahîhati’l-kelimât ba‘de’l-ihbâr mezbûre Afîfe zevci mezbûr Nuh Ağa cins-i nafakadan bir nesne bırakmadığına yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-a‘lâ eyledikden sonra hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi mezbûre Afîfe’ye sagīre kızı Fâtıma ile ma‘an zevci mezbûr Nuh Ağa üzerine târih-i kitâbdan külle yevm onar para nafaka ve kisve-bahâ farz ve takdîr edip <> sarfa ve vakt-i zarûretde istidâne ve lede’z-zafer mezbûr Nuh Ağa’dan rücû‘a merkūme Afîfe Hatun’a izin birle mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Fahrü’l-kuzât Abdullah Efendi b. Musa Efendi, el-Hâc Ali Kethudâ, Yusuf Çelebi b. Abdullah, Şâmî Mehmed Çelebi b. Ahmed, Abdullah b. Mehmed, el-Hâc Mehmed b. Hüseyin çukadâr.