Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 134 Hüküm no: 105 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Zeyniler mahallesinden İsmail Halîfe’nin küçük kızı Zeyneb ile Mustafa b. Mehmed’in muhâlaa ile boşandıkları Mahrûse-i Bursa mahallâtından Zeyniler mahallesi ahâlîsinde olup mahmiye-i İstanbul’da Âşık Paşa mahallesinde müsâfiren sâkin İsmail Halîfe b. Mehmed nâm kimesne meclis-i şer‘-i şerîf-i enverde sâbıkā dâmadı Mustafa b. Mehmed nâm kimesne mahzarında ikrâr ve takrîr-i kelâm edip mezbûr Mustafa’ya sulbiye sagīre kızım Zeyneb’i târih-i kitâbdan iki sene mukaddem sekiz bin akçe mehr-i müeccel tesmiyesiyle bi’l-velâye akd ve tezvîc eylediğimde ol dahi ba‘de’t-tezevvüc ve’l-kabûl beynlerinde hüsn-i zindegâneleri olmamağla zimmetinde mütekarrir ve ma‘kūdün-aleyh sekiz bin akçe mehr-i müecceli ve nafaka ve iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere târih-i mezkûrda bi’l-velâye mezbûr Mustafa ile muhâla‘a eyledikde ol dahi ba‘de’l-kabûl kızım sagīre-i mezbûre ba‘de’l-bulûğ mehr-i mezkûru mezbûr Mustafa’dan taleb ve da‘vâ ve ahz u kabz eder ise me’hûzuna ben dâmin [ve] kefîl olup mezbûr Mustafa benim iznim yoğiken menzilimden ahz u kabz eylediği bir Mushaf-ı şerîf ve bir menzil hücceti ve bir bağ hücceti ve üç tarla temessükünü bana def‘ ve teslîme ta‘ahhüd eylediğinden sonra beynimizde ma‘lûm on üç guruş kıymetli bir küpeye vesâir târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe sene 1143. Şuhûdü’l-hâl: Fahrü’l-kuzât es-Seyyid İbrahim Efendi b. Ebûbekir, Berber Ali Çelebi b. İbrahim, Osman Çelebi b. İbrahim, Mehmed Efendi b. İbrahim, Ahmed Efendi b. Mustafa, İsmail Efendi b. Hüseyin, Gümrükîzâde Mustafa Efendi b. ( ), Buhûrîzâde Abdullah Efendi b. ( ), Molla İbrahim b. Ahmed, Mustafa b. Ali, İbrahim Efendi el-Mansûrî, Hüseyin Efendi b. İbrahim ve gayruhum.