Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 135 Hüküm no: 107 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa vakfının hasbî mütevellisi Mehmed Efendi’nin kendi isteğiyle görevini bıraktığı Mahmiye-i İstanbul’da Balatkapısı dâhilinde Hoca Ali mahallesinde vâki‘ ashâb-ı hayrâtdan Mahmud Ağa nâm sahibü’l-hayrın gallesi evlâdına ve evlâd-ı evlâdına meşrûta lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzil arsasının ber-vech-i hasbî mütevellîsi olan Mehmed Efendi b. Mehmed tevliyet-i vakf-ı mezbûru hüsn-i rızâ ve ihtiyârı ile yine evlâd-ı vâkıf-ı mezbûrdan tevliyet-i mezbûra her vechile ehil ve müstakīm ve mütedeyyin olan Mehmed b. Süleyman nâm kimesneye ferâğat ve kasr-ı yed etmekle hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi kıbel-i şer‘den mezbûr Mehmed’i hasbî mütevellî nasb ve ta‘yîn buyurduklarında ol dahi kabûl ve hizmetini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: el-Hâc Abdurrahman Efendi b. Ali el-imâm, Süleyman Efendi b. Yusuf Efendi el-imâm-ı Molla Aşkî, Sahhâf Mustafa Çelebi b. Mahmud, Muhzır Salih Çelebi b. Süleyman.