Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 135 Hüküm no: 108 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Ahmed’in vârislerinin Darülhadis bahçesinde bulunan evi sattıkları Mahmiye-i İstanbul’da Dâye Hatun mahallesi sükkânından iken bundan akdem vefât eden Keresteci el-Hâc Ahmed b. Hüseyin b. Hasan’ın verâseti zevce-i metrûkesi Meryem bt. el-Hâc İbrahim b. Salih ve vâlidesi Hâcce Emetullah bt. Mustafa b. Abdurrahman nâm hatunlar ile li-ebeveyn kız karındaşı Hâcce Rukiye nâm hatuna münhasıra ve tashîh-i mes’elesi bi-tarîkı’l-adl on üç sehimden olup sihâm-ı mezbûreden üç sehm-i zevcesi mezbûre Meryem Hatun’a dört sehim vâlidesi mezbûre Hâcce Emetullah Hatun’a ve altı sehim kız karındaşı mezbûre Hâcce Rukiye Hatun’a isâbeti tahakkukundan sonra mezbûrât Meryem ve Hâcce Emetullah ve Hâcce Rukiye taraflarından husûs-ı âti’l-beyâna vekîlleri olduğu zâtları ma‘rifet-i şer‘iye ile ârifân Hasan b. Abdullah ve el-Hâc Osman b. Mustafa şehâdetleriyle ve sübût-ı vekâletine hükm-i şer‘î lâhık olan Ali Efendi b. Ali nâm kimesne meclis-i şer‘-i şerîf-i enverde bâ‘isü hâze’l-kitâb Ali Efendi b. el-Hâc Mustafa nâm kimesne mahzarında bi’l-vekâle ikrâr-ı kelâm edip arsasını senede on guruş ücret-i müeccele ile müteveffâ-yı mezbûrun hayatında tasarrufunda ve üzerinde ebniyesi ber-vech-i muharrer bâ-izn-i mütevellî yedinde mülk ve hakkı olup mahmiye-i mezbûrede Sarrâchâne kurbünde merhûm ve mağfûrün-leh Hüseyin Paşa vakfı Dârü’l-hadîs bahçesi dâhilinde vâki‘ bir bâb fevkāni oda ve bir bâb tahtânî odayı muhtevî köşkün ebniye-i memlûkesini cümle tevâbi‘ ve levâhıkı ile tarafeynden îcâb ve kabûlü hâvî bey‘-ı bâtt-ı sahîh-i şer‘î ile bi’l-vekâle mûmâ-ileyh Ali Efendi’ye yüz guruşa bey‘ ve temlîk ve teslîm ve arsasını bâ-izn-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eylediğinden sonra semeni olan meblağ-ı mezbûr yüz guruşu mûmâ-ileyh Ali Efendi yedinden bi’l-vekâle tamamen ahz u kabz eyledim ba‘de’l-yevm ebniye-i mezkûre mûmâ-ileyh Ali Efendi’nin mülk-i müşterâsı [28b] ve arsa-i mezkûre dâhil-i havza-i tasarrufu olup verese-i mezkûrenin kat‘a alâka ve medhalleri kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-[Zi]lka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mehmed Çelebi b. Abdullah, Mahmud Efendi kâtib-i vakf-ı mezbûr, İbrahim b. Mustafa, İsmail Efendi, diğer Mehmed b. Ahmed, Hüseyin Bey b. Hasan Ağa.