Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 136 Hüküm no: 109 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un Çukadâr Mehmed Ağa’da olan alacağın tahsil ettiği Mahmiye-i İstanbul’da Fethiye mahallesi sâkinelerinden olup zâtı Mehmed Çelebi b. Ali ve Mustafa Çelebi b. Ahmed nâm kimesneler ta‘rîfleriyle mu‘arrefe olan Afîfe bt. Abdullah nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Çukadâr Mehmed Ağa b. Alemşah nâm kimesne mahzarında ikrâr-ı tâm ve takrîr-i kelâm edip yedimde olan temessük mantûkunca yedimden müşterâ ve makbûz olan bir sîm sâ‘at semeninden otuz guruş ve hediyesi on iki guruşa müsâvî bir Mushaf-ı şerîf cem‘an kırk iki guruş hakkım olup meblağ-ı mezkûr kırk iki guruşu mezbûr Mehmed Ağa bana edâ ve teslîm ben dahi yedinden tamamen ahz u kabz eylediğimden sonra târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve muhâsâmâtdan her biri âharı[n] zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Karcıbaşı İbrahim Usta b. Abdullah, Kahveci Mehmed Beşe b. Mahmud, Attar İbrahim Çelebi b. Ömer, Ahmed Çelebi b. Mustafa ve gayruhum ecma‘în.