Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 137 Hüküm no: 110 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pınarhisar’ın Yenice köyünden Kocabaşı Dimo ile Mustafa Ağa arasındaki davanın sulhla sonuçlandığı Bâ-imzâ-i hazret-i efendi. Vilâyet-i Rumeli’nde Pınarhisar kazâsına tâbi‘ Yenice karye ahâlîsinden olup mahmiye-i İstanbul’da müsâfiren sâkin Kocabaşı Dimo v. Kostantin nâm zimmî meclis-i şer‘-i şerîf-i enverde Sadrazam-ı sâbık merhûm İbrahim Paşa Kethudâsı Mehmed Kethudâ’nın etbâ‘ından râfi‘u’l-vesîka Hüseyin Ağa b. Ahmed tarafından husûs-ı câ’i’z-zikre vekîl olduğu İbrahim Bey b. Mehmed ve Osman Bey b. Ali şehâdetleri ile şer‘an sâbit olan Mustafa Ağa b. Receb mahzarında ikrâr-ı tâm ve takrîr-i kelâm edip müvekkil-i merkūm Mustafa Ağa karyemize geldikde beni habs ve tecrîm ve yedimden bi-gayr-ı hakkın yedi bin guruşumu ahz u kabz eyledi deyü da‘vâ eylediğimde ol dahi inkâr etmekle beynimizde münâza‘ât-ı kesîre cereyân etmişidi. El-hâletü-hâzihi beynimizde muslihûn tavassut edip müvekkil-i mezbûr benimle üç bin [29a] üç yüz guruş üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr üç bin üç yüz guruşu müvekkil-i mezbûr Mustafa Ağa yedinden kabz ve tesellüm edip mâ‘adâya ve sâire müte‘allika âmme-i de‘âvî ve mutâlebât ve eymân ve muhâsamâtdan müvekkil-i mezbûrun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim. Min-ba‘d müvekkil-i mezbûr Mustafa Ağa ile vechen mine’l-vücûh sebeben mine’l-esbâb da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Bevvâb-ı Sultânî el-Hâc Ali Ağa, Emîn Mustafa Ağa, Hezargradlı Mehmed Ağa, Osman Çavuş Ağa, Mustafa Çavuş, el-Hâc Hasan Çelebi, Kantarcı İbrahim, Mübâşir el-Hâc Hüseyin Çavuş, Şeyh İbrahim Efendi, es-Seyyid Abdurrahman Çelebi Bâzergân, Bostâncı Hüseyin Çavuş, Emir Hacı Mustafa Ağa.