Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 137 Hüküm no: 111 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağyunus mahallesinden Abdullah Çelebi’nin ev hissesini karısına sattığı Mahmiye-i İstanbul’da Debbağyunus mahallesi sâkinlerinden Abdullah Çelebi b. Abdurrahman nâm kimesne meclis-i şer‘-i şerîfde zevce-i menkûhası bâ‘isetü hâzihi’l-vesikâ Fâtıma bt. Abdullah nâm hatun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Hattât İbrahim Efendi bir tarafdan sâbıkā Yeniçeri Ağası Hasan Ağa ve bir tarafdan el-Hâc Ahmed mülkleri ve bir tarafdan tarîk-ı âm ile mahdûd ulyâda bir bâb oda ve sofa ve vustâda bir oda ve safâ ve süflâda bir matbah ve havlu ve kenîfi muhtevî mülk menzilin nısf-ı şâyi‘i zevcem mezbûrenin yedinde mülk ve hakkı ve nısf-ı şâyi‘i âharı yedimde mülk ve hakkım olmağın ber-vech-i muharrer yedimde mülküm olan mârrü’z-zikr nısf-ı şâyi‘i bi-cümleti’t-tevâbi‘ ve’l-levâhık ber-mûceb-i defter-i müfredât eşyâ-i memlûke-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile zevcem mezbûre Fâtıma Hatun’a üç yüz elli guruşa bi-safkatin vâhidetin bey‘ ve temlîk ve teslîm ve semeni olan meblağ-ı mezbûru zevcim mezbûreye cihet-i karz-ı şer‘îden zimmetimde deynim olan yedi yüz guruşun ol mikdârına takās ve mahsûb eylediğimde ol dahi ber-vech-i muharrer iştirâ ve temellük ve tesellüm ve mukāssa ve kabûl eyledi. Min-ba‘d zikrolunan menzil ve eşyâ zevcem mezbûre Fâtıma Hatun’un mülk-i müşterâsı olup kat‘a benim alâka ve medhalim kalmadı. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Zeytuncu el-Hâc Ahmed b. Abdullah, Mustafa Çelebi b. Ahmed, Ömer Çelebi b. Osman, Mustafa Çelebi b. Abdülaziz, Salih Beşe b. İvaz, Duhancı Hüseyin Çelebi b. Mehmed, Mehmed Efendi b. Hasan.