Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 145 Hüküm no: 121 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş b. Mehmed’in cariyesini azat ettiği Rıkk-ı sâbıkını mu‘terif olmağla ber-vech-i âtî da‘vâya kıbel-i şer‘den me’zûne olan orta boylu çatık kaşlı kara gözlü Acemiyetü’l-asl işbu sahibetü’l-kitâb Hadîce bt. Abdullah meclis-i şer‘-i şerîf-i enverde kendiye rık olmak üzere vâzı‘u’l-yed olan Molla Ahmed b. Ebûbekir nâm kimesne mahzarında üzerine da‘vâ ve takrîr-i kelâm edip işbu hazır bi’l-meclis Derviş b. Mehmed nâm kimesne târih-i kitâbdan beş gün mukaddem yedinde mülk ve hakkı olduğum hâlde beni mâlından tahrîr ve i‘tâk edip ben sâir harâyir-i asliyât gibi hürre olmuş iken mezbûr Molla Ahmed bana bi-gayr-ı hakkın rık olmak üzere vaz‘-ı yed etmeğin mezbûr Molla Ahmed’e suâl olunup benden kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr Molla Ahmed cevâbında mevsûfe-i mezbûreyi rık olmak üzere mezbûr Derviş yüz doksan guruş semen-i medfû‘ ve makbûza beş gün mukaddem bey‘ ve temlîk ben dahi ber-vech-i muharrer iştirâ ve temellük etmişidim deyü rık olmak üzere vaz‘-ı yedini ikrâr mâ‘adâyı inkâr edicek mevsûfe-i mezbûreden ber-vech-i meşrûh müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Tahtelkal‘a kurbünde vâki‘ Kādıhanı demekle ma‘rûf hânda müsâfiren sâkin el-Hâc Ali b. Ali ve Mehmed b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mevsûfe-i mezbûreyi târih-i kitâbdan beş gün mukaddem mezbûr Derviş b. Mehmed yedinde mülk ve hakkı olduğu hâlde bizim huzûrumuzda mâlından tahrîr ve i‘tâk eyledi. Târih-i mezkûrdan beri mevsûfe-i mezbûre Hadîce sâir harâyir-i asliyât gibi hürre olmuşdur. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûrenin ıtkına ba‘de’l-hükm mezbûr Molla Ahmed’in kasr-ı yedine tenbîh ve sebîli tahliye olunup mâ-vaka‘a bi’t-taleb ketb olundu. Fî 12 min-Zilka‘deti’ş-şerîfe li-sene 1143. Şuhûdü’l-hâl: Mehmed Çelebi b. Abdullah tahtabaşı, Küçük Hüseyin b. el-Hâc Mehmed, Kādızâde İbrahim du‘âcı, Ahmed Çelebi b. Şa‘ban, İbrahim b. Süleyman.