Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 145 Hüküm no: 122 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ananya bt. Nikola’nın boşandığı kocasına açtığı mehir davasının sulhla sonuçlandığı Mahrûse-i Galata kazâsına tâbi‘ Beyoğlu mahallesinde sâkine olup zâtı Mehmed Ağa b. Ahmed ve Ali Beşe b. Ahmed ta‘rîfleriyle mu‘arrefe olan Ananya bt. Nikola nâm Nasrâniye meclis-i şer‘-i şerîfde sâbıkā zevci bâ‘isü hâze’l-vesîka Hekîm Sifodoş v. Arakil zimmî muvâcehesinde ikrâr ve takrîr-i kelâm edip Sifodoş zevcim olup bundan akdem beni bâyinen tatlîk etmekle zimmetinde mütekarrir ve ma‘kūdün-aleyh bin akçe mehr-i müeccelim ile cihet-i karzdan yetmiş guruş zimmetinde hakkım olmağla meblağ-ı merkūmu mezbûr Hekîm Sifodoş’dan taleb ve da‘vâ eylediğimde beynimizde ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremden beni merkūm Hekîm Sifodoş [32a] ile otuz beş guruş üzerine sulh ettiklerinde ben dahi sulh-ı mezkûru kabûl ve bedel-i sulh-ı mezkûr otuz beş guruşu yedinden tamamen ahz u kabz eylediğimden sonra husûs-ı mezkûra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mehmed Ağa b. Ahmed, Ali Beşe b. Ahmed, Ali Beşe b. Hüseyin, Mehmed Çelebi b. Abdullah, Mustafa b. Hasan.