Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 146 Hüküm no: 123 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İşbat nâhiyesinin Şirkemezin-i zir köyü tımarının Çilozâde Mustafa Bey’e verildiği Vilâyet-i Rumeli’de medîne-i İlbasan mahallâtından Subunî mahallesi sükkânından olup mahmiye-i İstanbul’da Sultan Mehmed Han Câmi‘-i şerîfi kurbünde Şekerciler Hânı’nda müsâfiren sâkin erbâb-ı tımardan râfi‘u’l-vesîka Çilozâde Mustafa Bey b. Mehmed nâm kimesne meclis-i şer‘-i şerîf-i enverde sadrazam bedr-i efhâm nâzım-ı menâzımü’l-ümem sa‘âdetlü semâhatlü İbrahim Paşa hazretlerinin Enderûn ağalarından Mustafa Ağa b. Halil mahzarında ikrâr-ı tâm ve takrîr-i kelâm edip mezbûr Mustafa Ağa zikrolunan İlbasan Sancağı’nda vâki‘ İşbat nâhiyesinde Şirmekize-i zîr [Şirkemezin-i zîr] nâm karye ve gayri[de]n on bin akçe tımarı zorba eşkıyâsından Zeynel ref‘inde[n] üzerime berat ettirip zikrolunan berat vesâir mesârif için mâlımdan beş yüz elli guruş mezbûr Mustafa Ağa’ya def‘ ve teslîm ol dahi yedimden ba‘de’l-kabz mesârif-i mezkûreye emrimle harc ve sarf etmekle meblağ-ı mezkûra müte‘allika âmme-i da‘vâdan ben mezbûr Mustafa Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi tımar-ı mezkûra müte‘allika âmme-i da‘vâ ve kâffe-i mutâlebâtdan kezâlik benim zimmetimi ibrâ ve ıskāt eyledi min-ba‘d husûs-ı mezkûra müte‘allika bir birimiz ile vechen mine’l-vücûh da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Fahrü’l-kuzâtü’l-eşrâf Mustafa Efendi, Umdetü’l-kuzât birâderi İbrahim Efendi, es-Seyyid Mehmed Çelebi b. Ahmed-i Nevrekob.