Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 147 Hüküm no: 124 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâyezidağa mahallesinden Rukiye Hatun’un kendine ait olan eşyasını validesi Ayşe Hatun’a sattığı Mahmiye-i İstanbul’da Bâyezid Ağa mahallesi sâkinelerinden olup zâtı Mustafa b. Abdullah ve Mehmed Çelebi b. Abdullah nâm kimesneler ta‘rîfleriyle mu‘arrefe olan Rukiye bt. Mustafa nâm hatun meclis-i şer‘-i hatîr-i lâzımü’t-tevkīrde vâlidesi olup bâ‘is[et]ü hâzihi’l-vesîka Âişe Hatun bt. Halil mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olan eşyâ-i memlûkemden Kelâmullâh ve on aded kadife yasdık ve bir başyasdığı ve üç kara mak‘ad ve dört minde[r] ve iki döşek ve beş yorgan ve bir orta keçesi ve bir çuka ocak peştemali bir çuka kapı perdesi ve çuka seccâde ve bir hamam kaliçesi ve on aded döşek çârşebi ve bir firâş ve bir iskemle ve bir mum sofrası ve üç aded tencere ve bir tâbe ve iki sini ve bir leğen ve bir ibrik ve bir güğüm ve iki kefçe ve bir hamam tası ve bir kil kutusu ve iki şam‘dân ve bir mum mikrâzı ve iki kahve tepsisi ve iki kahve ibriği ve bir dibek ve iki fincan ve on beş sahan ve sekiz lenger ve bir hoşâb tası ve bir maşraba ve bir kapaklı sahan ve bir ayna ve üç aded kaftan ve bir kavuşdurma ve altı aded anteri ve bir dîbâ kaplı kakum kürk ve bir incili kuşak ve bir çift sîm kuşak ve iki aded hâre habbe incili ve dört aded âbdest makraması ve bir havlu ve bir peşkir ve bir sofra ve bir sırma işleme sürmedân ve üç aded yüz yasdığı ve bir yasdık üzerine örtü peşkiri ve bir kebîr sîm çelenk [32b] ve iki sagīr çelenk ve bir sîm bıçak ve ki baş yemenîsi ve bir işleme yemenî ve dört aded peşkün ve beş aded çekme ve beş aded serpûş ve on aded gömlek ve on aded don ve dokuz aded destmâl ve yirmi aded yağlık ve on aded uçkur ve dört aded çintiyan ve bir ayaklı sandık ve üç aded sepet sandığı ve iki aded bürüncek don ve bir dülbend don ve bir dülbend örtüsü ve altı aded boğça ve bir çuka cübbe ve bir çift zümrüd küpe ve üç aded sîm kuşak ve bir çift altın bileziği tarafeynden îcâb ve kabûlü hâvî şurût-ı müfsideden ârî bey‘-ı kat‘î ile yüz elli guruşa vâlidem mezbûre Âişe Hatun’a safka-i vâhide ile bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semen olan meblağ-ı mezbûr yüz elli guruş mutâlebesinden vâlidem mezbûre Âişe’nin zimmetini ibrâ ve ıskāt eyledim. Fîmâ-ba‘d eşyâ-i muharrere-i mezkûre vâlidem mezbûrun mülk-i müşterâsı ve hakk-ı sırfı olup kat‘a benim alâka ve medhalim kalmamışdır. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘de sene 1143. Şuhûdü’l-hâl: Mehmed Çelebi b. Abdullah, Mustafa b. Hasan Urfalı. Kādızâde İbrahim b. Mustafa, Hüseyin Çelebi b. el-Hâc Mehmed, Yakub b. Abdullah.