Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 148 Hüküm no: 125 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancıbaşı bakkal dükkânı kiracısı Nikola’nın dükkânda bulunan eşyayı ortağına devrettiği Mahmiye-i İstanbul’da hısnı ebvâbından Ayakapısı hâricinde vâki‘ Bostancıbaşı dükkânı demekle ma‘rûf bakkāl dükkânında müste’cir olan Nikola v. Dimitri nâm zimmî meclis-i şer‘-i hatîr-i lâzımü’t-tevkīrde bâ‘isü’l-vesîka Salih b. Halil nâm kimesne mahzarında ikrâr-ı tâm ve takrîr-i kelâm edip mezbûr Salih mukaddemâ dükkân-ı merkūmda şerîkim olmağla beynimizde olan akd-i şirketi ba‘de’l-fesh pazarbaşımız Mehmed Ağa b. el-Hâc Hüseyin ve el-Hâc Mehmed b. Davud vesâirleri ma‘rifetiyle hesâb-ı kitâbımız görüldükden sonra dükkân-ı mezbûr derûnunda vâki‘ beynimizde ma‘lûm âlât vesâir zehâyirden hissemi mezbûr Salih’e yirmi dokuz bin akçeye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm eylediğinden sonra husûs-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve eymân ve muhâsamâtdan ben mezbûr Salih b. Halil’in zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde mezbûr Salih dahi târih-i merkūma gelince husûs-ı mezkûra vesâire müte‘allika âmme-i de‘âvî ve kâffe-i mutâlebât ve eymân ve muhâsamâtdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi. Fîmâ-ba‘d bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilka‘de sene 1143. Şuhûdü’l-hâl: Mehmed Ağa ser-bazârân, el-Hâc Mehmed b. Davud, Hüseyin Beşe b. Davud, Mehmed Çelebi b. Osman, Bostânî İsmail Ağa b. el-Hâc Mehmed Haseki, Halil Ağa b. el-Hâc İbrahim, Bostânî Hasan b. Ahmed, Abdullah Beşe b. Ahmed.