Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 148 Hüküm no: 126 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun’un küçük çocuğu için, boşandığı kocası Ali Çelebi’den nafaka talebi Bâ-imzâ-i hazret-i efendi. Nafaka. Mahmiye-i İstanbul’da Kabasakal mahallesinde vâki‘ Kurşunlu odalarda sâkine Hadîce bt. Hüseyin b. ( ) nâm hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iye ile ârifân es-Seyyid Osman Çelebi b. Osman ve Mustafa Çelebi b. Ahmed nâm kimesneler şer‘an sâbit olan Abdülkerim Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müvekkile-i mezbûre Hadîce Hatun’un zevc-i sâbıkı Ali Çelebi b. Abdullah mahzarında bi’l-vekâle takrîr-i kelâm ve ta‘bîr ani’l-merâm edip mezbûr Ali Çelebi’nin firâşından hâsıl ve müvekkilem mezbûreden mütevellide hâlâ bi-hakkı’l-hıdâne hacr ve terbiyesinde olan sagīre kızı Emine’nin mâlı olmayıp nafaka ve kisveye eşedd-i ihtiyâcı olmağla babası mezbûr Ali Çelebi üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak bi’l-vekâle matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīr-i mezbûre Emine’nin nafaka ve kisve vesâir levâzım-ı zarûriyesiʼçün babası mezbûr Ali Çelebi üzerine târih-i kitâbdan bi’t-terâzî beher yevm ikişer para nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisve vesâir levâzım-ı zarûriyesine harc ve sarfa ve lede’l-iktizâ istidâneye ve inde’z-zafer babası mezbûr Ali Çelebi üzerine rücû‘a müvekkile-i merkūme Hadîce Hatun’a izin vermeğin mâ-vaka‘a bi’t-taleb ketb olundu. Fi’l-yevmi’l-âşir <> min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: es-Seyyid Osman Çelebi b. Osman, Mustafa Çelebi b. Ahmed, Mehmed Çelebi b. Üveys, el-Hâc Hasan Çelebi b. Mehmed, Mehmed Çelebi b. İbrahim.