Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 284 Hüküm no: 405 Orijinal metin no: [59a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in boşandığı kocası Ahmed Çelebi’den hakkını aldığı Mahmiye-i İstanbul’da Yenibağçe’de Hürrem Çavuş Mahallesi’nde sâkine Fâtıma bt. Mehmed nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed Çelebi b. el-Hâc Mehmed mahzarında ikrâr ve takrîr-i kelâm edip kendi mu‘takam olmağla velîsi olduğum işbu <> hâzıratü fi’l-meclis Neslihan bt. Abdullah nâm sagīreyi iki bin akçe mehr-i mu‘accel ve vasfı beynimizde ilm-i şer‘î ile ma‘lûm bir çuka ferâce mehr-i müeccel ile mukaddemen mezbûr Ahmed Çelebi’ye velâyeten tezvîc ve inkâh eyledim, ol dahi minvâl-i muharrer üzere tezevvüc eyleyip halvet-i sahîha olundukdan sonra mezbûr Ahmed Çelebi merkūme Fâtıma’yı talâk-ı bâyin ile tatlîk etmeğin mezbûre Fâtıma’nın zikrolunan mehr-i müecceli ve mu‘acceli mezbûr Ahmed Çelebi zimmetinde bâkī kalmış idi. Hâlâ mezbûre Fâtıma’nın mârru’z--zikr iki bin akçe mehr-i müeccelini ve mihr-i mu‘acceli olan çuka ferâce mezbûr Ahmed Çelebi yedinde müstehlek olmağla üç yüz akçe kıymet-i şer‘iyyesini ve iki yüz akçe nafaka iddet-i ma‘lûmesini ki cem‘an iki bin beş yüz akçe sagīre-i mezbûre için merkūm Ahmed Çelebi’den velâyetim hasebiyle ahz u kabz eyledim, sagīre-i mezbûrenin merkūm Ahmed Çelebi zimmetinde bir akçe ve bir habbe hakkı bâkī kalmadı dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’t-tâsi‘ min-şehri Recebi’l-mürecceb li-sene erba‘a ve sittin ve elf. Şuhûdü’l-hâl: İbrahim Bey b. İsmail, Mehmed Bey b. Yusuf, Mustafa Çelebi b. Mehmed, Osman Bey b. Piyade, İbrahim Çelebi b. Davud, Pîrî Beşe b. Hüseyin, Rıdvan b. Abdullah, Mehmed Çelebi b. Hüseyin ve gayruhum mine’l-huzzâr.