Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 149 Hüküm no: 127 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın bir işinin halli için verdiği meblağı geri almak amacıyla Hüseyin Ağa’ya açtığı davanın sulhla sonuçlandığı Sulh [ve] ibrâ. Bi’l-fi‘il Bosna vâlîsi vezîr-i rûşen-zamîr sa‘âdetlü semâhatlü Osman Paşa yesserallâhu mâ-yetemennâhu ve mâ yeşâ hazretlerinin kapıcılar kethudâlığı hizmetleriyle şerefyâb olan Ahmed Ağa b. Muslu b. Abdurrahman tarafından husûs-ı âti’l-beyâna vekîl olduğu ber-mûceb-i hüccet Mahmud Ağa b. Ahmed ve Ahmed Ağa b. Abdullah şehâdetleriyle şer‘an sâbit olan Hüseyin Ağa b. Ahmed nâm kimesne meclis-i şer‘-i şerîfde bâ‘isü hâze’l-kitâb diğer Hüseyin Ağa b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh bundan akdem bir husûsun temşiyetiʼçün kendi mâlından bi-tarîkı’r-rüşve mezbûr diğer Hüseyin Ağa’ya bin üç yüz guruş def‘ ve teslîm ol dahi ber-vech-i muharrer yedinden ahz u kabz etmişidi deyü meblağ-ı mezbûru bi’l-vekâle taleb ve da‘vâ eylediğimde merkūm diğer Hüseyin Ağa ba‘de’l-inkâr ben müdde‘âmı isbât sadedinde iken beynimizde muslihûn tavassut edip da‘vâ-yı mezkûremden beni mezbûr diğer Hüseyin Ağa ile an-inkâr dört yüz elli guruş üzerine musâlaha eylediklerinde ben dahi sulh-ı mezbûru kabûl ve bedel-i sulh-ı mezkûr dört yüz elli guruşu yedinden ahz u kabz eylediğimden sonra mâ‘adâya müte‘allika âmme-i de‘âvî ve mutâlebât ve muhâsamâtdan ben bi’l-vekâle mezbûr diğer Hüseyin Ağa’yı ibrâ-i âm ile ibrâ ve ıskāt eylediğimde ol dahi bedel-i sulh-ı mezkûra müte‘allika âmme-i da‘vâdan beni ve müvekkil-i mûmâ-ileyhi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Kapı kethudâsı iken [Yeğen] Mehmed Ağa b. ( ), Mustafa Ağa b. Receb. Çavuşzâde Mustafa el-mübâşir, Mehmed Ağa b. Hasan, Hüseyin Ağa b. Bektaş, Ahmed Ağa b. Murtaza, Yakub Çelebi b. İbrahim, Mehmed Çelebi b. Abdullah.