Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 150 Hüküm no: 128 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un ölümünden sonra terekesi için kocası Haffâf Abdullah Çelebi’yi vasî tayin ettiği Mahmiye-i İstanbul’da Debbağyunus mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Abdullah nâm hatun meclis-i şer‘-i şerîf-i enverde zevci bâ‘isü hâze’l-kitâb Haffâf Abdullah Çelebi b. Abdurrahman mahzarında ikrâr ve takrîr-i kelâm edip bi-emrillâhi te‘âlâ vefât eylediğimde cemî‘ terekemden iki bin akçe ıskāt-ı salâtım için zevcim mezbûr vech-i şer‘î üzere fukarâya devr ede ve mâ‘adâ mahalle-i mezbûrede vâki‘ mülk menzil ve dâhilinde mevcûd ber-mûceb-i defter-i müfredât esâs-ı beyt ve huliy ve evânî-i nühâsiye ve gayr-ı nühâsiye ve bi’l-cümle ism-i mâl ıtlâk olunur terekemin nısfını bi’l-farzıyeti’ş-şer‘iye zevcim mezbûr ahz u kabz eylediğinden sonra nısf-ı bâkīsini dahi benim vâris ve vârisem olmamağla zevcim mezbûr ahz u kabz eyleye deyü vasiyyet ve tenfîzine zevcim mezbûr Abdullah Çelebi’yi vasîyy-i muhtâr nasb ve ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mustafa Çelebi b. Abdullah, Osman Çelebi b. ( ), Mehmed Efendi b. Ali, Mustafa Çelebi b. Abdurrahman, Hasan Efendi müezzin-i câmi‘-i Gül.