Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 150 Hüküm no: 129 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un küçük kızı için boşandığı kocasından nafaka talebi Medîne-i Galata’ya tâbi‘ kasaba-i Fındıklı’da Ayaz Paşa mahallesinde sâkine olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Hanife bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i sâbıkı Mustafa b. Mehmed mahzarında takrîr-i kelâm ve bast-ı merâm edip mezbûrun firâşından hâsıla ve benden mütevellide ve bi-hakkı’l-hıdâne hacr ve terbiyemde olan kızım Âişe nâm sagīrin mâlı olmamağla nafaka ve kisve ve sâir levâzım-ı zarûriyesiʼçün kıbel-i şer‘den kadr-ı ma‘rûf akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri sagīre-i mezbûrenin ber-vech-i muharrer nafaka ve kisve vesâir levâzım-ı zarûriyesiʼçün babası mezbûr Mustafa üzerine bi’t-terâzî târih-i kitâbdan külle yevm altışar akçe farz ve takdîr edip meblağ-ı mefrûz-ı mezkûru sagīre-i mezbûrenin nafakasıʼçün harc ve sarfa lede’l-iktizâ istidâne ve inde’z-zafer babası mezbûr Mustafa üzerine rücû‘a merkūme Hanife Hatun’a izin birle mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Zilka‘de li-sene selâse ve erba‘în ve mie ve elf. Şuhûdü’l-hâl: Mehmed Çelebi b. Abdullah, Ahmed b. Hasan, İbrahim b. Mustafa, es-Seyyid Ali b. Mehmed.