Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 151 Hüküm no: 130 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çilingir Artin’in Eminzâde Ahmed Ağa’da olan alacağının terekesinden ödenmesi Mahmiye-i İstanbul’da Sancakdâr Hayreddin mahallesinde mütemekkin Çilingir Artin v. Sergiz nâm zimmî meclis-i şer‘-i şerîf-i enverde bundan akdem Tersâne-i âmire emîni iken vefât eden Emînzâde Ahmed Ağa b. el-Hâc Mehmed’in evlâdı sıgārı Hüseyin ve Osman ve Ali ve Mehmed’in ber-mûceb-i hüccet vasîyy-i mansûbları ve terekesine bi’l-vesâye vâzı‘u’l-yed olan Ali Ağa b. Ahmed mahzarında üzerine da‘vâ ve takrîr-i kelâm edip târih-i kitâbdan bir sene mukaddem müteveffâ-yı mezbûr Ahmed Ağa’ya mecmû‘u altı bin iki yüz seksen beş akçe kıymetli yüz on dört aded kebîr ve sagīr Frengî kilit müteveffâ-yı mezbûra hayatında safka-i vâhide ile bey‘ ve teslîm ol dahi yedimden iştirâ ve tesellüm ve kabz ve kabûl meblağ-ı mezbûrun dört bin iki yüz akçesini yine hayatında yedinden ahz u kabz edip bâkī iki bin seksen beş akçesini müteveffâ-yı mezbûrun zimmetinde kalmağla terekesinden taleb ederim suâl olunup bana edâ ve teslîme tenbîh olunması matlûbumdur dedikde gıbbe’s-suâl ve akībe’l-inkâr müdde‘î-yi mesfûrdan ber-vech-i muharrer müdde‘âsına mutâbıka beyyine taleb olundukda udûl-i ahrâr-ı ricâl-i Müsliminden olup mahmiye-i mezbûrede Hubyar mahallesi ahâlîsinden Osman b. Halil ve Alacahamam kurbünde sâkin İsmail b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ târih-i kitâbdan bir sene mukaddem müdde‘î-yi merkūm Çilingir Artin zimmî mecmû‘ altı bin iki yüz seksen beş akçe kıymetli yüz on dört aded kebîr ve sagīr Frengî kilit müteveffâ-yı mezbûr Emînzâde Ahmed Ağa b. el-Hâc Mehmed nâm kimesneye bi-safkatin vâhidetin bizim huzûrumuzda hayatında bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle olmağın müdde‘î-yi mesfûr Artin zimmî tahlîf-i şer‘î ile ba‘de’t-tahlîf mûcebince meblağ-ı bâkī mezbûr iki bin seksen beş akçeyi müteveffâ-yı mezbûrun terekesinden müdde‘î-yi merkūm Artin zimmîye edâ ve teslîme vasîyy-i mezbûr Ali Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe sene 1143. Şuhûdü’l-hâl: Mehmed Çelebi b. Abdullah, el-Hâc Hasan b. Ahmed, İbrahim b. Mustafa, Mehmed Yazıcı b. Ali, Abdurrahman Çelebi b. Mustafa, Mustafa Yazıcı b. Ali, el-Hâc Hüseyin b. Ramazan, Ali Ağa b. Mehmed, Mehmed Yazıcı b. Ali.