Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 152 Hüküm no: 131 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi’nin Selimehatun mahallesinde bulunan ev hissesini sattığı Mahrûse-i Galata kazâsına tâbi‘ kasaba-i Fındıklı’da Selime Hatun mahallesinde sâkin Osman Çelebi b. Abdurrahman nâm kimesne meclis-i şer‘-i şerîf-i enverde bâ‘isü hâze’l-kitâb Çukadâr el-Hâc Mehmed b. Hüseyin mahzarında ikrâr ve takrîr-i kelâm edip mahalle-i mezbûrede vâki‘ iki tarafdan Attar el-Hâc Mustafa menzili ve bir tarafdan müteveffâ Halil Paşa veresesi mülkleri ve bir tarafdan [t]arîk-i âm ile mahdûd bir bâb fevkānî oda ve bir sofa ve tahtânî bir oda ve dehliz ve bir âbdesthâne ve kenîfi muhtevî mülk menzilin on altı sehim i‘tibârıyla beş sehm-i şâyi‘i Ali Kapudan b. el-Hâc Mustafa yedinde mülk ve hakkı olup on bir sehm-i şâyi‘i akd-i âtî sudûruna değin yedimde mülk ve hakkım olmağla ber-vech-i muharrer yedimde mülk ve hakkım olan mârrü’z-zikr on bir sehm-i şâyi‘i bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz otuz beş guruşa mezbûr Çukadâr el-Hâc Mehmed’e bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz otuz beş guruşu yedinden tamamen ahz u kabz eyledim. Fîmâ-ba‘d zikrolunan on bir sehm-i şâyi‘ mezbûr Çukadâr el-Hâc Mehmed’in mülk-i müşterâsı olup kat‘a benim alâka ve medhalim kalmadı. Keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Ramazan li-sene 1143 Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Kethudâ Yusuf Çelebi b. Abdullah, el-Hâc Ali b. Halil, el-Hâc Abdullah.