Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 152 Hüküm no: 132 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtibsinan mahallesinden Mehmed Ağa’nın yaşlı ve bunamış olan annesine vasî tayin edildiği Mahmiye-i İstanbul’da Kâtib Sinan mahallesi ahâlîsinden Mehmed Ağa b. Mehmed nâm kimesne meclis-i şer‘-i şerîf-i şerîfde takrîr-i kelâm ve ta‘bîr ani’l merâm edip mahalle-i mezbûre sâkinelerinden vâlidem İsmihan bt. Bayram nâm hatunun sinni doksan seneyi mütecâviz olmağla kendiye ateh vâki‘ olup emvâl ve eşyâsını hıfza adem-i iktidârından nâşî tasarrufâtdan hacr ve men‘ ve kıbel-i şer‘den vasî nasb ve ta‘yîn olunmak üzere ahvâli tefahhus ve istihbâr olunmak murâdımdır deyü ilhâh etmekle taraf-ı şer‘den irsâl olunan Mevlânâ Mehmed Abdullah Efendi b. el-merhûm Mehmed Efendi mezbûre İsmihan’ın sâkine olduğu mahalle-i mezbûreye varıp ahâlî-yi mahalleden es-Seyyid Mehmed Efendi b. es-Seyyid Abdülaziz Efendi ve el-Hâc Mehmed Ağa b. Mustafa ve el-Hâc Mustafa b. Mahmud ve el-Hâc Ali b. Hüseyin nâm kimesnelerden istihbâr ettikde fi’l-vâki‘ merkūme İsmihan Hatun’un sinni doksan seneyi mütecâviz olmağla kendiye ateh vâki‘ olup emvâl ve eşyâsını hıfza kādire olmayıp ve oğlu mezbûr Mehmed Ağa vesâyete ehil ve müstakīm olduğu her biri ba‘de’l-ihbâr mûmâ-ileyh Mehmed Efendi dahi mezbûre İsmihan Hatun’u mu‘âyene ve müşâhade eyledikden sonra mahâllinde ketb ve tahrîr ba‘dehû ma‘an ba‘s olunan Çukadâr Yakub b. Abdullah ve Muhzır Mustafa b. Mehmed ile meclis-i şer‘a gelip alâ-vukū‘ihî inhâ ve takrîr ettikde hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi merkūme İsmihan Hatun’u tasarrufâtdan hacr ve tesviye-i umûruna oğlu râfi‘u’l-kitâb mezbûr Mehmed Ağa’yı vasî nasb ve ta‘yîn buyurduklarında ol dahi vesâyet-i mezbûreyi ba‘de’l-kabûl merâsimini kemâ-yenbagī icrâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘de sene 1143. Şuhûdü’l-hâl: Mehmed Ağa kethudâ-yı muhzırân, Muhzır Salih Çelebi, Ali Ağa b. Abdullah, el-Hâc Ali b. Hüseyin, el-Hâc Mustafa b. Ömer, Molla Abdullah b. Mustafa.