Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 157 Hüküm no: 139 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacımuhyiddin mahallesinden Hadîce Hatun’a kendisini terk eden kocasından nafaka tayini Mahmiye-i İstanbul’da el-Hâc Muhyiddin mahallesi sâkinelerinden olup zâtı İmâm Abdullah b. Halil ve Müezzin Ebûbekir Halîfe b. ( ) ta‘rîfleriyle mu‘arrefe olan râfi‘atü’l-vesîka Hadîce bt. Ali nâm hatun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevcim Ömer b. Ahmed bilâ-nafaka beni terk ve âhar diyâra gitmekle nafaka ve kisve vesâir havâyic-i zarûriyem için mezbûr Ömer üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunup sarfa ve vakt-i zarûretde istidâne ve lede’z-zafer mezbûr Ömer’den rücû‘a izin verilmek murâdımdır deyip ve hâl minvâl-i meşrûh üzere olduğunu zeyl-i kitâbda mektûbü’l-esâmî Müslimîn dahi haber vermeleriyle merkūme Hadîce Hatun vech-i şer‘î üzere bade’t-tahlîfi’l-mu‘teber hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi mezbûre Hadice’nin nafaka ve kisve vesâir havâyic-i zarûriyesiçin târih-i kitâbdan külle yevm zevci mezbûr Ömer üzerine yirmi akçe nafaka ve kisve-bahâ farz ve takdîr edip sarfa ve vakt-i zarûretde istidâne ve lede’z-zafer zevci mezbûr Ömer’den rücû‘a izin vermeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilka‘de li-sene 1143. Şuhûdü’l-hâl: es-Seyyid Mehmed Ağa b. Ali, es-Seyyid Osman Çelebi b. Ali, Mehmed Çelebi b. Abdullah, Ali Çelebi b. Ahmed, İsmail Çelebi b. Ali, Mehmed Bey b. Abdullah, Salih Çelebi b. Süleyman muhzır.