Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 158 Hüküm no: 140 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacıhamza mahallesinden Fâtıma bt. Hasan’ın istiğlâl yoluyla evini vakıf mütevellisine sattığı Mahmiye-i İstanbul’da el-Hâc Hamza mahallesi sâkinelerinden olup zâtı Ahmed Çelebi b. el-Hâc Derviş ve İbrahim Çelebi b. Ahmed nâm kimesneler ta‘rîfleriyle mu‘arrefe olan Fâtıma bt. Hasan nâm hatun meclis-i şer‘-i hatîr-i lâzımü’t-tevkīrde el-Hâc Evhad ve Mukābeleci Mehmed Efendi nukūd-ı mevkūfelerine kāimmakām-ı mütevellî olan bâ‘isü hâze’l-kitâb Mustafa Ağa b. Abdullah mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Mumcu Kâzım menzili ve bir tarafdan Abdurrahman Ağa menzili ve bir tarafdan Abdullah Ağa bahçesi ve taraf-ı râbi‘i tarîk-ı âm ile mahdûd fevkānî ve tahtânî büyût-ı adîdeyi müştemil mülk menzilimi bi-cümleti’t-tevâ[bi‘] ve’l-levâhık merkūm Mustafa Ağa’ya bi-tarîkı istiğlâl yüz elli guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezbûr yüz elli guruşun yüz guruşunu <> mârrü’z-zikr el-Hâc Evhad elli guruşunu [36a] Mukābeleci Mehmed Efendi vakıflarından olmak üzere merkūm Mustafa Ağa yedinden tamamen ahz u kabz eylediğimden sonra mütevellî-yi merkūm Mustafa Ağa menzil-i mahdûd-ı mezkûru gıbbe’t-tahlîfi’ş-şer‘iye ve’t-takābuzü’l-mer‘î târih-i kitâbdan iki sene tamamına değin beher sene on yedişer buçuk guruşdan otuz beş guruşa bana îcâr ve teslîm ben dahi ber-minvâl-i muharrer istîcâr ve tesellüm ve kabz ve kabûl eyledim dedikde gıbbe’t-tasdîkı’ş-şer‘î akd-i mezbûr hakīkatde rehin ve meblağ-ı mezbûr merkūme Fâtıma Hatun zimmetinde deyn olmağla semen-i mezbûr ile ücret-i mezkûreye mezbûre Fâtıma Hatun’un zevci işbu hazır bi’l-meclis el-Hâc Mehmed b. Hüsrev bi’l-emr ve’l-kabûl kefâlet-i sahîha ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilka‘de li-sene 1143. Şuhûdü’l-hâl: Mustafa Efendi b. Receb, Mehmed Halîfe b. Ebûbekir, el-Hâc Mustafa b. Hasan, Molla Ali b. Halil, diğer Molla Ali b. Receb, Sarı Mehmed b. Abdullah.