Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 160 Hüküm no: 142 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un boşandığı Mehmed Çelebi’de kalan mehir ve eşyası için açtığı davanın sulhla sonuçlandığı Muhâla‘a. Bâ-imzâ-i hazret-i efendi. Mahmiye-i İstanbul’da Divâne Ali mahallesi sâkinelerinden olup zâtı ta‘rîf-i şer‘î ile mu‘arrefe olan Râbia Hatun bt. Mehmed meclis-i şer‘-i şerîf-i enverde zevc-i mutallıkı râfi‘u’l-vesîka Mehmed Çelebi b. Hüseyin nâm kimesne mahzarında ikrâr-ı tâm ve takrîr-i kelâm edip zevcim mezbûr beni tatlîk etmekle zimmetinde mütekarrir mehr-i müeccel-i ma‘lûmem ile iki anteri ve bir sinca[b] kürk ve bir altın bilezik ve sîm kuşak ve altın temim[em]i vermeyip yedinde kaldı deyü da‘vâ eylediğimde ol dahi bi’l-cümle mehir ve eşyâ-i muharrere da‘vâsından ancak elli beş guruş üzerine benimle sulh olup kabz-ı bedel ve âmme-i da‘vâdan zimmetimi ibrâ ve ıskāt eylemişdik deyü def‘le mukābele edip ben dahi ibrâ-yı merkūmun vukū‘unu inkâr edip beynimizde münâza‘ât-ı kesîre vâki‘ olmağla merkūm Mehmed Çelebi mâlından bana on beş guruş vermekle ben dahi yedinden kabz ve tesellüm edip mehr-i müeccel-i ma‘lûmem ve eşyâ-i muharrere-i merkūme ve bi’l-cümle hukūk-ı ma‘lûme ve mechûleye müte‘allika de‘âvî ve mutâlebât ve eymân ve muhâsamâtdan mezbûr Mehmed Çelebi’nin zimmetini ibrâ ve ıskāt eyledim <> her birimizin âhar ile vechen mine’l-vücûh ve sebeben mine’l-esbâb da‘vâ ve nizâ‘ ve husûmeti kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilka‘de li-sene 1143. Şuhûdü’l-hâl: İbrahim Çelebi b. Mehmed, el-Hâc Mehmed b. Ahmed, Mehmed Çelebi b. Mustafa, Ahmed Çavuş b. Hasan, Salih Çelebi el-muhzır.