Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 66 Hüküm no: 59 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyhan Sultan’ın doğumu sebebiyle şenlikler düzenlenmesi İzzet-meâb şerî‘at-nisâb hâlâ Adalar nâhiyesinde nâibimiz efendi kâm-yâb ba‘de’t-tahiyyeti’l-vâfiye inhâ olunur ki hamdullâhi te‘âlâ işbu mâh-ı Şa‘bâni’l-mu‘azzam’ın gurresi isneyn günü ale’s-seher şevketlü, kerâmetlü, mehâbetlü, kudretlü veliyyi’n-ni‘metimiz efendimiz pâdişâh-ı âlem-penâh hazretlerinin sulb-i pâk-i tâb-nâklerinden bir duhter-i pakize ahter-zîver-i nehd-i vücûd ve isimleri Beyhan Sultân ismiyle müsemmâ buyrulup kudûm-ı meymenet-lüzûmları içün ibtidâsı bâ-fermân-ı âlî yarınki Çarşamba gününden olup üç gün ve üç gece donanma-i hümâyûn ve şehrâyin-i mu‘tâd-ı kadîm ve de’b-i müstedim olduğuna binâen sâbıkda olduğu vech üzere dekâkîn ashâbını huzûrunuza da‘vet ve herkes dükkânlarını tezyîn ve leyâlîde dahi karâr ve izhâr-ı âsâr-ı şâdumânîye ibtidâr eylemelerini nâhiye-i mezbûre ahâlîsine tenbîh ve tefhîm eyleyesiz ve’s-selâm. Fî 2 Şa‘bâni’l-mu‘azzam sene [1]179 El-fakīr es-Seyyid Mehmed Masum Kalfalızâde [La‘lîzâde] el-Kādı bi-medîneti Üsküdar.