Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 167 Hüküm no: 150 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un ayrıldığı kocasından kendisine ait eşyalarını teslim aldığı Tahakkuk-ı özr-i şer‘îye binâen hilâl-i sütûrda mastûr husûsun mahâllinde ketb ve tahrîri için bi’l-iltimâs savb-ı şer‘-i kavîmden irsâl olunan Mevlânâ Hüseyin Efendi b. Mehmed mahmiye-i İstanbul’da Atmeydânı kurbünde Firuzağa mahallesinde sâkin Mehmed Paşazâde fahrü’l-akrân Süleyman Bey nâm kimesnenin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde zâtı ma‘rifet-i şer‘iye ile ârifân mûmâ-ileyh Süleyman Bey ve Ahmed Ağa b. Mehmed ta‘rîfleriyle mu‘arrefe olan Rukiye bt. Abdullah nâm hatun meclis-i ma‘kūd-ı mezkûrda hâlâ Tersâne-i âmire kâtibi olan zevc-i muhâlı‘ı işbu hâfızü’l-kitâbi’l-müstetâb Ahmed Efendi b. Mehmed mahzarında ikrâr-ı tâm ve takrîr-i kelâm edip mezbûr Ahmed Efendi zevcim olup beynimizde şikāk vâki‘ olmağla menzilinde olan eşyâ-i memlûkemden bir Mushaf-ı şerîf ve iki pâfte altın kuşak ve bir zümrüd elmas taşlı iğne ve bir sagīr elmas ve bir dîbâ cübbe ve bir şâlî sof cübbe ve bir şâlî anteri ve bir keremsûd entâri ve bir dîbâ kavuşdurma ve bir dîbâ entâri ve bir telli hatâyî kavuşdurma ve bir telli hatâyî entâri ve bir dîbâ şalvar ve bir serhaddî sof ve bir kakum biniş kürk ve def‘a keremsûd kablı kürk ve bir dîbâ kablı su samuru beden kürkü ve bir kabsız karsak kürk ve bir kabsız vaşak kürk ve bir sincab kürk ve bir kırmızı çuka biniş ve iki paftalı incili kuşak ve iki pâfteli sîm kuşak ve bir sîm maşraba ve bir pendül sâ‘at ve bir sof ferâce ve bir çuka ferâce ve bir telli hatâyî şalvar ve bir turuncu şal kuşak ve bir sarı şal kuşak ve işleme çuka seccâde ve bir hatâyî boğça ve bir penbe şilte ve üç yemenî yasdık ve bir döşek ve üç kalemkârî yemenî yorgan ve iki işleme yüz yasdığı bir Yanbolu beyaz kebe ve bir teber ve tahta sandık ve iki ayaklı sandık ve bir ceviz piştahtamı mezbûr Ahmed Efendi bana def‘ ve teslîm ben dahi yedinden tamamen ahz u kabz eyledim. Fîmâ-ba‘d eşyâ-i muharrere-i mezkûreden mezbûr Ahmed Efendi yedinde ve zimmetinde bir nesne hakkım bâkī kalmadı. Mezbûr ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Çukadâr İbrahim b. Osman ve Muhzır Ahmed b. Şa‘ban ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 Zilka‘deti’ş-şerîfe sene [1]143. Şuhûdü’l-hâl: Mehmed Paşazâde Mehmed Bey, Sipâhîzâde Vahid Feyzullah Efendi, birâderi Abdurrahman Efendi, Ahmed Ağa b. Ömer, İbrahim Çavuş b. Halil, Hasan Efendi b. Abdullah, Abdurrahman Çelebi b. Fazlullah, Mustafa Efendi b. Süleyman halîfe-i İslâmbol.