Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 168 Hüküm no: 151 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun ile Ahmed Efendi’nin muhâlaa yoluyla boşandıkları Tahakkuk-ı özr-i şer‘îye binâen hilâl-i sütûrda mastûr husûsun mahâllinde ketb ve tahrîri iltimâs olunmağın savb-ı şer‘-i şerîf-i enverden irsâl olunan Mevlânâ Hüseyin Efendi b. Mehmed mahmiye-i İstanbul’da Firuzağa mahallesinde sâkin Mehmed Paşazâde fahrü’l-akrân Süleyman Bey nâm kimesnenin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm ettikde zâtı ma‘rifet-i şer‘iye ile ârifân mûmâ-ileyh Süleyman Bey ve Ahmed Ağa b. Mehmed nâm kimesneler ta‘rîfleriyle mu‘arrefe olan Rukiye bt. Abdullah nâm hatun meclis-i ma‘kūd-ı mezkûrda hâlâ Tersâne-i âmire kâtibi olan zevc-i dâhili işbu hâfızü’l-kitâb Ahmed Efendi b. Mehmed nâm kimesne mahzarında ikrâr-ı tâm ve takrîr-i kelâm edip mezbûr Ahmed Efendi zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh yirmi yedi bin akçe mehr-i müeccelim ve nafaka-i [39a] iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olup ve eşyâ-i memlûkemden kendiye medfû‘um olan işbu mu‘âyene ve müşâhade olunan iki yüz guruş kıymetli bir samur kontuş kürk ve yüz guruş kıymetli bir elmas yüzük ve altmış guruş kıymetli altı aded inci ve otuz guruş kıymetli sîm buhûrdân ma‘a gülâbdân bedel-i hul‘ olmak üzere zevcim mezbûr Ahmed Efendi ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete ve eşyâ-i mezkûreye ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve eymân [ve] muhâsamâtdan ben mezbûr Ahmed Efendi’nin zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ-i âm ile ibrâ ve ıskāt eyledi. Min-ba‘d bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Çukadâr İbrahim Çelebi b. Osman ve Muhzır Ahmed b. Şa‘ban ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fî 27 min-Zilka‘deti’ş-şerîfe sene [1]143. Şuhûdü’l-hâl: Mehmed Paşazâde Süleyman Bey, Sipâhi Efendizâde Vahid Feyzullah Efendi, Sipâhi Efendizâde, karındaşı Abdurrahman Efendi, Ahmed Ağa b. Ömer, Hasan Efendi b. Abdullah, İbrahim Çavuş b. Halil, el-Hâc Mustafa b. Abdullah, Abdurrahman Çelebi b. Fazlullah, Mustafa Efendi b. Süleyman Halîfe.