Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 169 Hüküm no: 152 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynî Hatun’un Yâsin okumak şartıyla vakfettiği evin Mehmed b. Ömer’e verildiği Tevcîh-i menzil. Ashâb-ı hayrâtdan Aynî nâm hatun rûhyiʼçün beher yevm birer sûre-i Yâsin-i şerîf tilâvet etmek üzere süknâsını alâ-vechi’t-tertîl ve’t-tecvîd kırâet-i Kur’ân-ı azîme kādir bir recül huffâza şart eylediği mahmiye-i İstanbul’da Seyyid Ali mahallesinde vâki‘ bir tarafdan İbrahim Ağa değirmeni ve bir tarafdan Medîne-i münevvere vakfından ( ) Hanım tasarrufunda olan menzil ve bir tarafdan tarîk-ı hâs ve bir tarafdan tarîk-ı âm ile mahdûd vakf menzile ber-mûceb-i şart-ı vâkıfe tevcîh-i hâkim-i şer‘le mutasarrıf olan sulehâdan Ali Çelebi b. Mahmud vefât edip menzil-i mahdûd-ı mezkûr mahlûl olmağla yine sulehâdan olup menzile muhtâc ve ber-vech-i meşrûh ve meşrûta ve mahall ü müstahık olduğu zeyl-i kitâbda mektûbü’l-esâmî Müslimîn haberleriyle müte‘ayyin olan râfi‘u’l-vesîka el-Hâc Mehmed b. el-Hâc Ömer nâm kimesneye şart-ı vâkıfeye ri‘âyet etmek üzere hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri tevcîh buyurmalarıyla işbu vesîka ketb ve yedine i‘tâ olundu. Fî 26 Zilka‘deti’ş-şerîfe sene [1]143. Şuhûdü’l-hâl: eş-Şeyh Ahmed Efendi b. Mustafa, el-Hâc Hasan b. Mehmed, Süleyman Ağa b. Hüseyin, Halil Ağa b. Mustafa, Abdullah b. Mehmed, Mehmed Bey b. Ahmed, Mustafa b. Mehmed, Ali Çelebi b. Mehmed, Mehmed Çelebi b. Mustafa, İbrahim Çelebi b. Mustafa, Hüseyin Çelebi b. Hasan, Hasan b. Zülfikar.