Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 169 Hüküm no: 153 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin cariyesini azat ettiği Itâknâme. Yedi aklâmdan Başmuhâsebe hulefâsının reisleri umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Halil Efendi b. Hasan b. Abdülmennan tarafından husûs-ı âti’z-zikri ikrâra vekîl olduğu etbâ‘ından Mustafa Çelebi b. Abdul ve el-Hâc Mustafa b. Mehmed nâm kimesneler şehâdetleriyle sâbit ve sübût-i vekâletine hükm-i şer‘î lâhık olan Receb Çelebi b. Mehmed nâm kimesne meclis-i şer‘-i şerîf-i enverde müvekkil-i mûmâ-ileyhe rıkk-ı sâbıkını mu‘terife olan orta boylu açık sarı elâ gözlü Rusiyetü’l-asl Müslimetü’l-mille bâ‘isetü hâzihi’l-vesîka Emine bt. Abdullah mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh mevsûfe-i mezbûre Emine’yi hasbeten lillâhi te‘âlâ ve taleben li-merzâti Rabbihi’l-a‘lâ târih-i kitâbdan dört sene mukaddem mâlından tahrîr ve i‘tâk ve kayd-ı rıkdan ıtlâk eyledi. Mevsûfe-i mezbûre târih-i mezkûrdan beri sâir harâyir-i asliyât gibi hürr[e] olup müvekkil-i mûmâ-ileyhin mevsûfe-i mezbûre üzerinde velâ-i şer‘iyeden gayri nesne hakkı bâkī kalmadı dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fî 27 Zilka‘de sene [1]143. Şuhûdü’l-hâl: Ali Efendi halîfe-i haslar, Halil Çelebi b. Ahmed, Ali Efendi b. Mustafa, el-Hâc Mehmed, es-Seyyid Mehmed Çelebi b. ( ) tâbi‘-i Süleyman Efendi, Osman Bey b. Hüseyin, Ahmed Çelebi b. Mustafa.