Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 170 Hüküm no: 154 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey’in Murad Paşa-yı Atîk mahallesinde bulunan bostanını istiğlâl yoluyla sattığı İstiğlâl. 1.000 guruş. Mahmiye-i İstanbul’da Nuri Dede mahallesi ahâlîsinden İbrahim Bey b. Kara Mustafa Paşa meclis-i şer‘-i hatîr-i lâzımü’t-tevkīrde bâ‘isetü hâzihi’l-vesîka Fâtıma Hanım bt. İbrahim b. Hüseyin tarafından husûs-ı âti’z-zikri tasdîka vekîl olduğu zât-ı mezbûreyi bi’l-ma‘rifeti’ş-şer‘iye ârifân olan Süleyman Ağa b. Abdullah ve Molla Ömer b. Mehmed nâm kimesneler şehâdetleriyle sâbit olan Mehmed Ağa b. Ramazan nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Murad Paşa-yı atîk mahallesinde vâki‘ bir tarafdan ba‘zen Şem‘dânî Mehmed Ağa ve oğlu Hüseyin Ağa ve vâlidesi Ümmügülsüm Hanım menzilleri ve bir tarafdan ba‘zen Bezzâzistânî es-Seyyid ( ) menzili ve ba‘zen Ders-i âm Kürd Ali Efendizâde İbrahim Efendi ve ba‘zen Abdullah Ağa menzilleri ve bir tarafdan ba‘zen İmâm Ahmed Efendi ve ba‘zen İsmail Paşazâde İbrahim Bey tasarrufunda olan vakıf arsa ve bir tarafdan tarîk-ı âm ile mahdûd iki tarafdan taş duvar ve iki bi’r-i mâ ve enkāz-ı ma‘lûmeyi müştemil mülk bostanımı müvekkile-i mûmâ-ileyhâ Fâtıma Hanım’a bi-tarîkı’l-istiğlâl bin guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabz ve kabûl edip semeni olan meblağ-ı mezbûr bin guruşu müvekkile-i mûmâ-ileyhâ Fâtıma Hanım yedinden bi’t-tamam ve’l-kemâl ahz u kabz eylediğimden sonra müvekkile-i mûmâ-ileyhâ Fâtıma Hanım bostan-ı merkūmu târih-i vesîkadan bir sene tamamına değin ber-nehc-i şer‘î yüz yirmi guruşa yine bana îcâr ve teslîm ben dahi istîcâr ve kabûl eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 Zilka‘de sene [1]143 Şuhûdü’l-hâl: Mehmed Ağa b. Abdullah, Mehmed Efendi b. Süleyman, Abdullah Ağa b. Mehmed, Mehmed Ağa b. Mehmed, Kādızâde İbrahim b. Mustafa du‘âcı, Abdullah Çelebi b. Mustafa, Salih b. Süleyman.