Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 285 Hüküm no: 408 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mehmed ile Ahmed’in babalarından kalan evlerini sattıkları Vilâyet-i Anadolu’da kasaba-i Larende mahallâtından Kirişçi Baba Mahallesi sâkinelerinden Ümmühani bt. Mehmed nâm hatun kendi tarafından asâleten ve li-ebeveyn karındaşı Ahmed Beşe tarafından hasm-ı câhid-i şer‘î mahzarında nehc-i şer‘î üzere vekâleti sâbite olmağın vekâleten meclis-i şer‘-i şerîfde mahalle-i mezbûre sâkinlerinden bâ‘isü’l-kitâb es-Seyyid Yahya Çelebi b. ( ) mahzarında ikrâr-ı tâm ve takrîr-i kelâm edip mahalle-i mezbûrede vâki‘ babam müteveffâ-i merkūm Mehmed’den bana ve karındaşım merkūm Ahmed Beşe’ye irs-i şer‘le intikāl edip iki tarafdan yine kendi mülk menzilimi ve bir tarafdan el-Hâc Süleyman mülkü ve bir tarafdan tarîk-i âm ile mahdûd olup bir tâbhâneyi ve ahırı ve sofayı ve havluyu müştemil olan mülk menzilimizi kendi tarafımdan asâleten ve karındaşım merkūm Ahmed Beşe tarafından vekâleten tarafeyden îcâb ve kabûlü hâvî bey‘-i bâtt-ı sahîh-i şer‘î ile merkūm es-Seyyid Yahya Çelebi’ye bin üç yüz elli akçeye bey‘ ve teslîm ol dahi iştirâ ve kabûl eyledikden sonra semen-i merkūm bin üç yüz elli akçeyi merkūm es-Seyyid Yahya Çelebi yedinden tamamen ahz u kabz edip menzil-i mahdûd-ı mezkûru mahallinde kabz ve tasarrufa müşteri-i mezbûru taslît eyledim dedikde mukırra-i mezbûrenin vech-i meşrûh üzere cârî olan ikrâr ve takrîrini el-mukarru lehü’l-mezbûr vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâdis min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Ebûbekir b. Solak, Mehmed Çelebi b. el-Hâc Ali, Mustafa Beşe b. Hızır, Diğer Mustafa Beşe b. Himmet, el-Hâc Ahmed ve gayruhum mine’l-huzzâr.