Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 286 Hüküm no: 409 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhabazâde Ahmed Efendi’nin şîruganhane ve içindeki eşyaları oğlu Muhsin Çelebi’ye hibe ettiği Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul’da Kepenekçi Sinan Mahallesi’nde sâkin cenâb-ı şerîfleri Merhabazâde demekle ma‘rûf olan umdetü’l-ulemâi’l-izâm zübdetü’l-fudalâi’l-fihâm Ahmed Efendi hazretlerinin menziline varıp zeyl-i kitâbda isimleri mastûr olan Müslimîn huzûrlarında akd-i meclis-i şer‘-i şerîf eyledikde müşârun-ileyh Ahmed Efendi meclis-i mezbûrda sulbî kebîr oğlu fahrü’l-mehâmidi’l-kiram Muhsin Çelebi mahzarında ikrâr ve takrîr-i kelâm edip ceddim merhûm, mezbûr Kepenekçi Sinan Evkāfı’ndan olup mahalle-i mezbûrede vâki‘ iki tarafı vakf-ı mezbûrdan meşrûtiyet üzere mutasarrıf olduğum işbu menzil ve bir tarafı yine vakf-ı mezbûrdan Fahri Hatun mutasarrıf olduğu menzil ve bir tarafı tarîk-i âm ile mahdûd olan vakıf arsa üzerinde ma‘rifet-i mütevellî ve izn-i hâkimü’ş-şer‘ ile kendi mülküm olmak üzere nefsim için binâ eylediğim şîruganhânede muhammin tahmîni ile sabıkā yetmiş iki bin akçeye tahmîn olunan mülk ebniyemi ve iki değirmen taşlarımı (...) kazganı oğlum mezbûr Muhsin Çelebi’ye hibe-i sahîha-i şer‘iyye ile hibe ve temlîk edip ol dahi meclis-i hibede ittihâb ve kabûl eyledikden sonra zikrolunan şîruganhâne arsasının dahi hakk-ı tasarrufunu vakf-ı mezbûr mütevellîsi olan işbu hâzır bi’l-meclis Ahmed Bey b. Ali ma‘rifetiyle ferağ ve tefvîz eyledim ol dahi tefevvüz ve kabûl eyledi, mârru’z--zikr şîruganhânede benim alâka ve medhalim kalmayıp ebniye-i mezbûre ve değirmen taşları ve kazganlar mezbûr Muhsin Çelebi’nin mülk-i mevhûbu ve arsa-yı mezkûre dâhil-i taht-ı tasarrufu olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’l-mu‘teber vâki‘ hâli mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan [60a] el-Hâc Şa‘ban b. Ahmed ve Mehmed b. Bahadır ile gelip herbiri vukū‘u üzere inhâ ve takrîr etmeğin mâ-vaka‘a gıbbe’t-taleb ketb ve terkīm olundu. Tahrîren fi’l-yevmi’l-muntasıf min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Fahrü’l-kuzât Davud Efendi b. Ahmed, Mehmed Efendi b. Mustafa el-müderris, Abdulkādir Efendi b. Abdurrahman el-müderris, es-Seyyid Abdullah Efendi, Abdülvehhab Çelebi b. Abdurrahman el-müderris, Mahmud Efendi b. Şa‘ban, Halil Bey b. Mahmud ve gayruhum mine’l-huzzâr.