Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 172 Hüküm no: 156 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci Osman Beşe’nin yaralanarak öldüğü iddiasıyla vârisleri tarafından açılan davanın sulhla sonuçlandığı Sulh. Mahmiye-i İstanbul’da Kumkapı kurbünde İbrahim Paşa mahallesi sükkânından iken ber-vech-i âtî bundan akdem cerîhan vefât eden Cebeci Osman Beşe b. Hasan b. Abdullah’ın verâseti zevce-i metrûkesi Fâtıma bt. Abdullah nâm hatun ile sulbiye kızı Ümmügülsüm nâm sagīreye münhasıra olduğu lede’ş-şer‘i’l-enver zâhir ve müte‘ayyin oldukdan sonra kendi nefsinden asîl ve sagīre kızı mezbûre Ümmügülsüm’ün tesviye-i umûruna kıbel-i şer‘den mansûbe vasîsi olan vâlidesi mezbûre Fâtıma Hatun zâtı mahalle-i mezbûre imâmı es-Seyyid Mehmed Efendi b. es-Seyyid Ali ve Müezzin Hasan Halîfe b. el-Hâc İbrahim ta‘rîfleriyle mu‘arrefe olduğu hâlde meclis-i şer‘-i şerîf-i enverde Dergâh-ı âlî yeniçerilerinin otuz birinci bölüğe mahsûs oda neferâtından işbu sahibü’l-kitâb Yusuf Beşe bin İsmail nâm kimesne mahzarında bi’l-asâle bi’l-vesâye ikrâr ve takrîr-i kelâm edip târih-i kitâbdan yüz yirmi sekiz gün mukaddem mahalle-i mezbûrede Turşucu dükkânı köşesinde siyah kabzalı bıçak ile ba‘de’l-mağrib mezbûr Yusuf Beşe ber-mûceb-i i‘lâm zevcim mezbûr Osman’ın sol bâzûsuna karîb mahâlden ve sol omuzundan koltuğuna karîb mahâlden amden ve bi-gayr-ı hakkın darb ve cerh ve ol gece müteessiren vefât etmekle mûceb-i şer‘îsini asâleten ve vesâyeten mezbûr Yusuf Beşe’den taleb ve da‘vâ eylediğimde ol dahi husûs-ı mezkûru bi’l-külliye inkâr etmeğin benim dahi isbâtdan aczim olmağla sulh sagīr-i mezbûre hakkında her vechile enfa‘ ve evlâ olduğuna binâen beynimizde muslihûn tavassut edip da‘vâ-yı mezkûremden mezbûr Yusuf Beşe’yi benimle an inkâr yüz elli guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu mezbûr Yusuf Beşe yedinden tamamen ahz u kabz eylediğimden sonra zevcim müteveffâ-yı mezbûrun dem ve diyetine müte‘allika âmme-i da‘vâdan mezbûr Yusuf Beşe’nin zimmetini ibrâ-i âmm-ı râfi‘u’l-hısâm ile bi’l-asâle ve bi’l-vesâye ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 27 min-Zilka‘de sene [1]143. Şuhûdü’l-hâl: es-Seyyid Mehmed Efendi b. Ali el-imâm, Ahmed Halîfe b. Hasan el-müezzin, Mumcu Yusuf Beşe b. Ömer el-mübâşir, es-Seyyid Ahmed Çelebi b. es-Seyyid Yusuf, es-Seyyid Ali Berber, İsmail Ağa b. Yusuf, Osman Çelebi b. Ali, es-Seyyid Hasan b. es-Seyyid Ömer, Hasan Beşe dülger, Mehmed Çelebi b. Hasan.