Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 176 Hüküm no: 161 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uşak mukataası mutasarrıfı Receb Ağa’nın aleyhine Uşak kazası ahalisi adına Mehmed Ağa tarafından açılan davanın sulhla sonuçlandığı Vilâyet-i Anadolu’da Uşak kazâsı ahâlîsinden el-Hâc Ali b. Ali ve el-Hâc Mustafa b. el-Hâc Ali ve el-Hâc Mehmed b. el-Hâc Ali ve el-Hâc Ahmed b. Mehmed ve el-Hâc Hüseyin b. el-Hâc Mustafa, el-Hâc Halil b. Mehmed ve el-Hâc Mehmed b. Yusuf ve el-Hâc Ali b. Ahmed ve es-Seyyid el-Hâc Ömer b. es-Seyyid Osman ve Ömer Efendi b. Mehmed Efendi ve el-Hâc Süleyman b. el-Hâc İvaz ve el-Hâc Ali b. Sefer ve el-Hâc Mustafa b. Ahmed ve el-Hâc Mehmed b. Abdullah ve Yusuf b. Mehmed ve el-Hâc Ali b. Yusuf ve Ramazan b. Dede ve Ahmed b. Mehmed ve Mehmed b. Şa‘ban ve Sefer b. Receb ve Durmuş b. Ahmed nâm kimesneler sâir ma‘lûmü’l-esâmî ve mahsûrü’l-eşhâs kimesneler taraflarından husûs-ı âti’l-beyâna vekîl olduğu yedinde olan hüccet-i vekâlet mantûkunca İbrahim Ağa b. Şa‘ban ve İsmail b. Mustafa nâm kimesneler şehâdetleriyle şer‘an sâbit olan Mehmed Ağa b. Mustafa meclis-i şer‘-i şerîf-i enverde sâbıkā Uşak mukāta‘asına ber-vech-i mâlikâne mutasarrıf olan râfi‘u’l-kitâb Receb Ağa b. İbrahim mahzarında bi’l-vekâle ikrâr ve takrîr-i kelâm edip kırk üç senesinde vâki‘ sefer-i hümâyûn için Uşak kazâsından bâ-fermân-ı âlî matlûb olan altmış aded mehâr deve ve yirmi sekiz re’s katır için müvekkillerim mezbûrûnun mezbûr Receb Ağa’ya her deve için yüz beşer guruş ve tahsildâriye yüz otuz beş guruş ve her bir katır için mîrîsinden mâ‘adâ doksan ikişer guruş ve tahsildâriye seksen beş guruş ve iştirâsı fermân buyurulup Bardakcı [41a] <> menziline nakli fermân buyrulan dört bin keyl şa‘îrden merkūm Receb Ağa zimmetine tecâvüz eden yedi yüz on yedi keyl şa‘îr ve üç yüz kırk üç keyl hıntayı ve ücret-i nakli için her keyline verilen yirmişer parayı mezbûr Receb Ağa’dan taleb ve da‘vâ ve ahz u kabza ve kendilere îsâle ahâlî-yi kazâ-i mezbûr taraflarından beni vekîl ve nâib-i menâb nasb ve ta‘yîn etmeleriyle Âsitâne-i sa‘âdet’e gelip mezbûr Receb Ağa’dan zikrolunan husûsları bi’l-vekâle taleb ve da‘vâ sadedinde olduğunda ol dahi zikrolunan mehâr deve ve katırları taraf-ı mîrîye teslîm eylediğine yedinde taraf-ı mîrîden senedleri olmağla mâ‘adâ yedi yüz on yedi keyl şa‘îr ve üç yüz kırk üç keyl hınta kıymeti olmak üzere bana üç yüz guruş teslîm etmekle ben dahi yedinden bi’l-vekâle ahz u kabz edip husûs-ı muharrere-i merkūmeye müte‘allika da‘vâdan mezbûr Receb Ağa’nın zimmetini bi’l-vekâle ibrâ ve ıskāt eylediğimde ol dahi kabûl ve âmme-i da‘vâdan müvekkillerim mezbûrunun zimmetlerin ibrâ ve ıskāt etmekle min-ba‘d da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Zilhicceti’ş-şerîfe sene [1]143. Şuhûdü’l-hâl: Hacı Ali b. Ahmed, el-Hâc Mehmed b. Ali, Mehmed b. İsmail, el-Hâc Mehmed b. Yusuf, Hacı Mustafa b. Ali, el-Hâc Ahmed b. Mehmed, el-Hâc Halil b. Murad. Hacı Halil b. Hamza, Kaliçe Beşe, Hacı Hızır Ağa b. el-Hâc Ahmed.