Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 177 Hüküm no: 162 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne Kıncıfiruz mahallesinden Zeyneb Hatun’un Roben v. İlya’da alacağı olduğu iddiasıyla açtığı davadan vazgeçtiği Cerâ el-emrü hasbemâ hurrire fîhi nemekahü’l-fakīr ileyhi sübhânehû te‘âlâ Ömer el-müvellâ hilâfeten bi-medîneti Kostantıniyyeti’l-mahmiye -ufiye anh.- Kat‘-ı nizâ‘. Mahrûse-i Edirne’de Kıncı Firuz mahallesinde sâkin iken bundan akdem vefât eden el-Hâc Mehmed b. Hüseyin b. Şa‘ban’ın verâseti zevce-i menkûha-i metrûkesi Zeyneb bt. Osman nâm hatun ile sulbî oğlu Mehmed ve sulbiye kızı Fâtıma nâm sagīrlere münhasıra olduğu şer‘an zâhir oldukdan sonra kendi nefsinden asîl ve sagīrân-ı mezbûrânın tesviye-i emirlerine kıbel-i şer‘den mansûbe vasîleri olan mezbûre Zeyneb Hatun meclis-i şer‘-i şerîf-i enverde bâ‘isü hâze’s-sifr Roben v. İlya nâm Yahûdî muvâcehesinde üzerine da‘vâ ve takrîr-i kelâm edip târih-i kitâbdan dört sene mukaddem otuz dokuz târihinde zevcim müteveffâ-yı mezbûr ber-mûceb-i temessük hayatında mâlından iki bin beş yüz guruş mesfûr Yahûdî’ye idâne ve teslîm ol dahi yedinden istidâne ve tesellüm ve kabz ve istihlâk eylediğinden sonra kable’l-ahz vefât etmeğin mezbûr Yahûdî’ye suâl olunup meblağ-ı mezbûr bana edâ ve teslîme tenbîh olunması bi’l-asâle ve bi’l-vesâye matlûbumdur dedikde gıbbe’s-suâl mezbûr Roben Yahûdî cevâbında husûs-ı mezkûru bi’l-külliye inkâr eylediğinden mâ‘adâ târih-i mezkûrede ben medîne-i Selanik’de ticâret vechi üzere sâkin idiğimi şehâdet ve tevâtür ile isbât ederim deyü da‘vâ-yı def‘ ve def‘-i mezkûrunu [isbât] etmek üzere iken müdde‘iyye-i mezbûre zikrolunan temessükü ahz ve şak edip mesfûr Yahûdî ile husûs-ı mezkûra müte‘allika kat‘a da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Tahtacı Mehmed Çelebi b. Abdullah, Hüseyin Çelebi b. el-Hâc Mehmed, Kādızâde İbrahim Çelebi b. Mustafa, Salih Çelebi b. Süleyman.