Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 178 Hüküm no: 163 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Todori ve ortağının yeniçeri tayinatı için verdikleri unun parasını Gümrük-i âmireden aldıkları Mîrî uncu tâifesi. Mîrî uncu tâifesinden Todori v. Yorgi ve şerîki Mihail v. Todori nâm zimmîler meclis-i şer‘-i şerîfde bi’l-fi‘il Gümrük-i âmire emîni olan umdetü’l-emâcid ve’l-a‘yân bâ‘isü hâze’l-kitâb İvaz Mehmed Ağa b. Abdülmennan b. Abdurrahman’ın çukadârı ve taraflarından zikri âtî husûsu tasdîka vekîlleri olduğu ber-nehc-i şer‘î sâbit olan Hüseyin Bey b. Receb mahzarında her biri ikrâr ve takrîri kelâm edip Dergâh-ı âlî dâme mahfûfen bi’l-meâli yeniçerileri ta‘yînâtlarıʼçün sekbân fırınında kabzına me’mûr olanlara bey‘ ve teslîm târih-i kitâb senesi Rebî‘ülevveli’nin yirmi birinci gününden sene-i mezbûre Cumâdelûlâsı’nın on sekizinci gününe gelince elli altı günde müctemi‘ iki bin sekiz yüz altmış dört keyl ve sekiz vakıyye dakīkin her keyli yüz on altışar akçeden üç yüz otuz iki bin iki yüz yetmiş akçe fermân-ı âlî müvekkil-i mûmâ-ileyh uhdesinde olan mârrü’z-zikr Gümrük-i âmire mâlından havâle buyurulmağın müvekkil-i mûmâ-ileyh meblağ-ı mezkûr üç yüz otuz iki bin iki yüz yetmiş akçeyi ber-vech-i muharrer tamamen bize def‘ ve teslîm biz dahi müvekkil-i mûmâ-ileyh yedinde tamamen ahz u kabz eyledik min-ba‘d meblağ-ı mezbûrede emîn-i müvekkil-i mûmâ-ileyh yedlerinde ve zimmetlerinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Mustafa Ağa emîn-i Sandıklı, Salih Efendi kâtib-i gümrük, Ebûbekir Efendi emîn-i gümrük-i kahve, Abdullah Ağa nâzır-ı gümrük, Çukadâr Ahmed Ağa.