Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 287 Hüküm no: 410 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ziyade bt. Mosi ve kocası Yako v. Yako’nun evini alan el-Hâc Halil Bey’in evi sonradan çıkabilecek ayıplarıyla kabul ettiği Mahmiye-i Galata muzâfâtından kasaba-i Tophâne’de ( ) Mahallesi’nde sâkin el-Hâc Halil Bey b. Mustafa mahfil-i kazâda mahmiye-i İstanbul’da Kerdüz cemâ‘atinden olup ikrâr-ı âti’l-beyânı tasdîka kendi cânibinden asîl ve zevcesi Ziyade bt. Mosi nâm Yahûdiye tarafından hasm-ı câhid mahzarında el-Hâc İshak b. Mehmed ve el-Hâc Said Ağa ve el-Hâc Yahya şehâdetleri ile sâbitü’l-vekâle vekîl olan işbu bâ‘isü’s-sifr Yako v. Yako nâm Yahûdi muvâcehesinde ikrâr-ı tâm ve takrîr-i kelâm edip mezbûr Yako müvekkilesi mezbûre Ziyade ile merhûm Üsküdârî eş-Şeyh Mahmud Efendi’nin -kuddise sırruhü’l-azîz- evkāfından icâre-i mu‘accele ve yevmî on beş akçe ücret-i müeccele ale’s-seviyye ile mutasarrıf oldukları İstanbul’da Balıkpazarı’nda vâki‘ bir tarafı Bostancıbaşı Vakfı ve bir tarafı mîrî Tüfenkhâne ve bir tarafı sâhil-i bahr ve bir tarafı tarîk-i âm ile mahdûd olup fevkānî ve tahtânî büyût-ı müte‘addideyi ve mahzen ve selhhâneyi müştemil olan menzilin hakk-ı tasarrufunu vakf-ı mezbûrun mütevelliyesi ma‘rifetiyle iki yük elli beş bin akçe bedel mukābelesinde bana tefvîz edip ben dahi tefevvüz ve kabûl eyledikden sonra bedel-i mezbûrun kırk beş bin akçesini nakd ve iki yüz on bin akçesini her miskāli üçer buçuk riyâlî guruşa olmak üzere yedi yüz on iki miskāl portakal inci def‘ ve teslîm edip mezbûr Yako müvekkilesi mezbûre Ziyade dahi kabz ve tesellüm etmişler idi. Mezbûrân Yako ve müvekkilesi Ziyade’den vech-i muharrer üzere tefevvüz eylediğim menzil-i merkūmu bi-külli ayb tefevvüz ve kabûl eylemişdim, min-ba‘d mezbûrânı menzil-i mezbûrun aybına müte‘allik da‘vâdan ibrâ ve ıskāt eyledim, eğer menzil-i mezbûrun ayıbına muttalî‘ olup da‘vâya şürû‘ edersem lede’l-hükkâmi’l-kirâm istimâ‘ olunmaya dedikde gıbbe’t- <> tasdîkı’l-mu‘teber menzil-i mezbûrun ba‘de’l-yevm zuhûr eden ayıbına müte‘allik da‘vâdan mezbûrânın zimmetleri berî olmağın mâ-vaka‘a gıbbe’t-taleb ketb olundu. Fi’l-yevmi’l-ışrîn min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Osman Çelebi solak, el-Hâc Abdullah b. el-Hâc Abdurrahman, el-Hâc Ramazan b. Mehmed, İbrahim Çelebi b. Davud, Pîrî Beşe b. Hüseyin, Ali çukadâr.