Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 181 Hüküm no: 169 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Söğüdlü nâhiyesinin Bahçe köyünden Fatıma’nın boşandığı kocasında olan mehri için açtığı dava İkrâr-ı deyn. Vilâyet-i Anadolu’da Boyabad kazâsına tâbi‘ Söğüdlü nâhiyesinde Bahçe nâm karyede sâkine bâ‘isetü’l-kitâb Fâtıma bt. Mehmed b. Abdullah nâ[m] hatunun babası ve tarafından husûs-ı âti’l-beyâna vekîl olduğu zât-ı mezbûreyi bi’l-ma‘rifeti’ş-şer‘iye ârifân karye-i mezbûre sükkânından Mustafa b. Mehmed ve Mehmed b. Mustafa nâm kimesneler şehâdetleriyle şer‘an sâbit olan Mehmed b. Mehmed nâm kimesne meclis-i şer‘-i şerîf-i enverde müvekkile-i mezbûrenin zevc-i mutallıkı karye-i mezbûre ahâlîsinden Veli b. Veliyüddin mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Fâtıma Hatun altı bin akçe mehr-i müeccel tesmiyesiyle mezbûr Veli’nin zevce-i menkûhası olduğu hâlde mezbûr Veli müvekkilem mezbûreyi târih-i kitâbdan dört ay mukaddem tatlîk etmekle hâlâ mehr-i mezkûru olan meblağ-ı mezbûr altı bin akçeyi mezbûr Veli’den bi’l-vekâle taleb ederim suâl olunup alıverilmesi matlûbumdur dedikde gıbbe’s-suâl mezbûr Veli cevâbında fi’l-vâki‘ kazıyye minvâl-i muharrer üzere olduğunu <> ikrâr ve i‘tirâf etmeğin alâ-mûceb-i i‘tirâf mehr-i mezbûr altı bin akçeyi müvekkile-i mezbûr için müdde‘î-yi mezbûra edâ ve teslîme mezbûr Veli’ye tenbîh birle mâ-vaka‘a bi’t-taleb ketb olundu. Fî 2 Zilhicce sene [1]143. Şuhûdü’l-hâl: Tahtacı Mehmed Çelebi b. Abdullah, Kādızâde İbrahim b. Mustafa, Tütüncü Mehmed Çelebi b. Mustafa, Mustafa b. Mehmed, Mehmed b. Mustafa, Salih b. Süleyman, Abdünnebi b. Ali, Debbağ Mustafa b. Mehmed, Urfalı Mehmed b. Mustafa.